ارد و ورلڈ کینیڈا ( ویب نیوز ) پاکستان کرکٹ ٹیم کے سابق کپتان اور دنیا بھر میں فٹنس کے حوالے سے مشہور شعیب ملک نے اب تک ریٹائرمنٹ نہ لینے کی وجہ بتا دی۔

حال ہی میں بنگلہ دیش پریمیئر لیگ (بی پی ایل) میں رنگپور رائیڈرز کی جانب سے کھیلنے والے پاکستانی آل راؤنڈر نے کہا کہ ‘میرا یقین کریں حالانکہ میں ٹیم میں سب سے زیادہ سینئر ہوں، آپ میری فٹنس کا موازنہ 25 سالہ کھلاڑی سے کر سکتے ہیں۔

بی پی ایل کے دوران بات کرتے ہوئے انہوں نے کہا کہ ‘میں کرکٹ کھیلتا رہوں گا اور اسی لیے ریٹائرمنٹ کے بارے میں سوچ بھی نہیں رہا ۔واضح رہے کہ گزشتہ روز اپنی 41ویں سالگرہ منانے والے شعیب ملک نے 2001 میں بنگلہ دیش کے خلاف ٹیسٹ ڈیبیو کیا تھا۔

شعیب ملک نے اس کے علاوہ 1999 میں ویسٹ انڈیز کے خلاف ون ڈے اور 2006 میں ٹی ٹوئنٹی ڈیبیو کیا۔ شعیب ملک نے پاکستانی ٹیم میں آخری ٹیسٹ میچ 2015 میں کھیلا تھا جبکہ آخری ون ڈے میچ 2019 میں اور آخری ٹی ٹوئنٹی میچ 2021 میں کھیلا تھا۔