اردو ورلڈ کینیڈا ( ویب نیوز )پاکستان تحریک انصاف کے رہنمائوں نے کہا ہے کہ سابق وزیراعظم عمران خان کو گرفتار کیا گیا تو تمام کارکن تیار رہیں، ہم پورے پاکستان میں پرامن احتجاج کی کال دیں گے۔

زمان پارک کے باہر میڈیا سے گفتگو کرتے ہوئے پی ٹی آئی رہنما فواد چوہدری کا کہنا تھا کہ عمران خان کے خلاف اب تک 74 مقدمات درج کیے گئے ہیں، ان میں سے 30 فوجداری مقدمات ہیں، ہم عدالتوں میں قانون کے مطابق نمٹ رہے ہیں، کسی بھی شخص کے لیے یہ ممکن نہیں کہ سب مقدمات میں فوری پیش ہو پاکستان میں فاشسٹ حکومت اور نظام ہے، آئین پاکستان کو پامال کرنے کی کوششیں کی جا رہی ہیں۔
سابق وزیراطلاعات نے کہا کہ کسی طرح الیکشن ملتوی کرنا چاہتے ہیں، چاہتے ہیں کہ سپریم کورٹ کے احکامات پر عمل درآمد نہ ہو، ایک مفرور 50 روپے کے اسٹامپ پیپر پر لندن بھاگ گیاہے، عدالتیں طلب کیوں نہیں کر رہی

وائس چیئرمین پی ٹی آئی شاہ محمود قریشی نے کہا کہ عمران خان کی جان کو خطرہ تھا اور ہے، خدشہ ہے کہ عمران خان پر ایک اور حملے کا منصوبہ بنایا جا رہا ہے، عمران خان کی گرفتاری کا کوئی حکم ہمارے نوٹس میں نہیں

شاہ محمود قریشی نے کہا کہ سینئر قیادت زمان پارک پہنچ چکی ہے، عمران خان سے مشاورت کے بعد اپنا ردعمل دیں گے، ہمارا سیاسی ردعمل بھی ہوگا، تاہم گھبرانے کی ضرورت نہیں۔

شاہ محمود قریشی نے مزید کہا کہ عمران خان نے حملہ کرنے والوں کو معاف کرنے کا اعلان کیا، عمران خان نے اپنے خطاب میں یکجہتی کی بات کی، پاکستان کو اس وقت سیکیورٹی اور معاشی مسائل کا سامنا ہے، عمران خان نے ہمیشہ قانون کی حکمرانی کی پاسداری کی ہے۔