اردو ورلڈ کینیڈا ( ویب نیوز)وفاقی وزیر خزانہ اسحاق ڈار کا کہنا ہے کہ معیشت کی بہتری کے لیے آئی ایم ایف سے معاملات جلد طے پا جائیں گے۔
اسلام آباد چیمبر آف کامرس اینڈ انڈسٹری کی جانب سے غیر ملکی سفیروں کے اعزاز میں دی گئی افطار ڈنر پارٹی میں مہمان خصوصی کی حیثیت سے خطاب کرتے ہوئے وفاقی وزیر خزانہ محمد اسحاق ڈار نے کہا کہ آئی ایم ایف کے ساتھ دوست ممالک کے تعاون کے بعد معاملات طے پا جائیں گے جس سے معاشی استحکام میں مدد ملے گی۔ موجودہ مشکلات پر قابو پالیں گے اور معیشت بحالی کی طرف بڑھے گی۔
وزیر خزانہ نے کہا کہ 2016 میں پاکستان دنیا کی 24ویں بڑی معیشت تھی اور ہم جی 20 میں شامل ہونے کا سوچ رہے تھے لیکن اس وقت ہماری معیشت کو شدید اقتصادی چیلنجز کا سامنا ہے۔
اسحاق ڈار نے دعویٰ کیا کہ پاکستان ڈیفالٹ نہیں کرے گا۔ انہوں نے مزید کہا کہ حکومت معیشت کو پائیدار ترقی کی راہ پر گامزن کرنے کے لیے ہر ممکن کوشش کر رہی ہے۔ وفاقی وزیر خزانہ نے سفیروں کے اعزاز میں افطار ڈنر کے انعقاد پر آئی سی سی آئی کے اقدام کو سراہا۔
