اردوورلڈ کینیڈا ( ویب نیوز)پاکستان کے پہلے نشان حیدر کیپٹن محمد سرور شہید کی 75ویں برسی آج منائی جا رہی ہے۔کیپٹن محمد سرور 27 جولائی 1948 کو آزاد کشمیر کے علاقے تلپتر میں کشمیر پر بھارتی فوج کی جارحیت کے دوران مادر وطن کا دفاع کرتے ہوئے شہید ہوئے تھے۔

قیام پاکستان کے بعد کیپٹن محمد سرور شہید نے پاک فوج میں شمولیت اختیار کی اور 1948 میں پنجاب رجمنٹ کی سیکنڈ بٹالین میں کمپنی کمانڈر کے طور پر خدمات انجام دے رہے تھے جب انہیں کشمیر میں آپریشن کی ذمہ داری سونپی گئی۔
27 جولائی 1948 کو انہوں نے کشمیر کے اڑی سیکٹر میں دشمن کی اہم فوجی پوزیشن پر اس طرح حملہ کیا کہ دشمن کو اپنی پوسٹ چھوڑ کر بھاگنا پڑا۔
کیپٹن محمد سرور شہید نے مادر وطن کے دفاع کے لیے بڑی بہادری اور جرات کا مظاہرہ کیا، سینے میں گولی لگی اور جام شہادت نوش کیا۔
دوسری جانب افواج پاکستان نے کیپٹن محمد سرور شہید کو ان کی برسی پر خراج عقیدت پیش کیا ہے۔