اردوورلڈ کینیڈا (ویب نیوز)فیڈرل بورڈ آف ریونیو (ایف بی آر) نے واجبات کی عدم ادائیگی پر پاکستان انٹرنیشنل ایئرلائنز (پی آئی اے) کے بینک اکاؤنٹس منجمد کر دئیے

ذرائع کے مطابق پی آئی اے کئی ماہ کے ٹیکسوں کی بنیاد پر 2 ارب سے زائد کی مقروض ہے۔

یاد رہے کہ پی آئی اے کے 53 اکاؤنٹس گزشتہ سال بھی عدم ادائیگی پر منجمد کیے گئے تھے، بعد ازاں انتظامیہ کی جانب سے واجبات کی جلد ادائیگی کی یقین دہانی پر اکاؤنٹس بحال کیے گئے تھے۔

دوسری جانب پی ایس او نے بھی قومی ایئرلائن کی 3 پروازوں کو ایندھن فراہم کرنے سے انکار کردیا ہے۔

ایندھن کی عدم دستیابی کے باعث اسلام آباد سے کراچی جانے والی پرواز پی کے 309، کراچی سے ملتان اور پی کے 739 کی ملتان سے جدہ جانے والی پروازیں متاثر ہوئی ہیں۔

پی آئی اے کے ترجمان نے ایف بی آر کی جانب سے بینک اکاؤنٹس منجمد کیے جانے کی تصدیق کرتے ہوئے کہا ہے کہ اکاؤنٹس کی بحالی کے لیے ایف بی آر سے رابطے کیے جا رہے ہیں۔

ترجمان پی آئی اے کا کہنا ہے کہ اکاؤنٹس بند ہونے کے باوجود فضائی آپریشن جاری ہے۔