اردو ورلڈ کینیڈا ( ویب نیوز ) چیئرمین پی سی بی مینجمنٹ کمیٹی ذکا اشرف نے کہا ہے کہ قومی کرکٹ ٹیم کے غیر ملکی کوچز کے مستقبل کا فیصلہ کرکٹ کمیٹی کرے گی۔
پی سی بی مینجمنٹ کمیٹی کا سربراہ بننے کے بعد ذکاء اشرف نے پاکستان کرکٹ کی سب سے بڑی ویب سائٹ www.cricketpakistan.com.pk کو اپنا پہلا انٹرویو دیا، جس کے دوران ٹیم ڈائریکٹر مکی آرتھر اور ہیڈ کوچ گرانٹ بریڈ برن سمیت کوچنگ اسٹاف بھی موجود تھے۔
متبادل کے سوال پر ان کا کہنا تھا کہ ہم نے فی الحال اس بارے میں نہیں سوچا، مصباح الحق کی سربراہی میں کمیٹی بنائی گئی ہے جو کرکٹ کے تمام معاملات کو دیکھے گی۔ میں آپ سے بات کروں گا، پاکستان کرکٹ کی بہتری کے لیے ہم سب کو فیصلے کرنے ہوں گے، ہم چاہتے ہیں کہ ٹیم ٹاپ پر آئے اور ملک کا نام روشن ہو۔انہوں نے کہا کہ مجھے اس سے کوئی فرق نہیں پڑتا کہ کوچ مقامی ہو یا غیر ملکی، جو بہتر پرفارم کرے وہی ہونا چاہیے۔
ہمیں اپنی ٹیم کو بہتر بنانا ہے، ایسے لوگ ہونے چاہئیں جو اسے ٹاپ پر لے جائیں، ابھی تک کوچز اچھا کام کر رہے ہیں، کمیٹی کی سفارشات آئیں گی اور پھر فیصلہ کریں گے۔ذکا اشرف نے کہا کہ ہم نے چیف سلیکٹر کے بارے میں بھی سوچا ہے اور کچھ لوگوں سے بات کی ہے، کرکٹ کمیٹی کی رائے آئی تو مل بیٹھ کر کسی فیصلے پر پہنچیں گے، فی الحال سلیکشن میں غیر ملکی کوچز کا کردار ہے۔ کرکٹ کمیٹی سفارشات تیار کرے گی تو حتمی ہو گی۔
