اسرائیل کی جانب سے فلسطینیوں کی نقل و حرکت کے لیے محفوظ گزرگاہ قرار دیے گئے رفح پر رات گئے اسرائیلی بمباری میں خیموں میں پناہ لینے والے بچوں سمیت کئی فلسطینی مہاجرین شہید ہو گئے۔امریکی نشریاتی ادارے CNN کی شائع کردہ امریکی انٹیلی جنس رپورٹ کے جائزے کے مطابق 7 اکتوبر سے اسرائیل کی جانب سے غزہ میں فضا سے زمین پر گرائے گئے 29000 سے زائد بموں میں سے 45 فیصد یعنی وہ بغیر کسی رہنمائی کے تھے۔
عرب نشریاتی ادارے الجزیرہ کے مطابق 7 ہزار 729 سے زائد بچوں اور 5 ہزار 153 سے زائد خواتین سمیت شہید فلسطینیوں کی تعداد 18 ہزار 608 سے تجاوز کر گئی ہے جب کہ 7 اکتوبر سے غزہ پر اسرائیلی حملوں میں 8 ہزار 663 سے زائد بچے مارے جا چکے ہیں۔ 6 ہزار 327 سے زائد خواتین سمیت 594 فلسطینی زخمی ہوئے ہیں۔فلسطینی وزارت تعلیم کے مطابق غزہ اور مقبوضہ مغربی کنارے میں 3 ہزار 714 طلباء شہید جب کہ 5 ہزار 700 سے زائد زخمی ہوئے ہیں۔وزارت تعلیم کے مطابق غزہ میں شہید طلباء کی تعداد 3 ہزار 679 ہے اور مقبوضہ مغربی کنارے میں 35 طلباء اسرائیلی جارحیت کا نشانہ بن چکے ہیں۔
ادھر اسرائیلی فوج نے ایک بار پھر بے گھر فلسطینیوں کو شمالی غزہ اور خان یونس چھوڑنے کا الٹی میٹم دے دیا۔اسرائیلی جارحیت کے خلاف فلسطینیوں کی مزاحمت جاری ہے، حماس کے جنگجوؤں نے شدید مزاحمت کے دوران شمالی غزہ اور خان یونس میں متعدد اسرائیلی ٹینکوں کو تباہ کردیا، جس کے بعد متعدد اسرائیلی فوجی اپنی گاڑیاں چھوڑ کر فرار ہوگئے۔دوسری جانب لبنان کی مزاحمتی تنظیم حزب اللہ نے بھی اسرائیلی علاقوں پر حملے کیے، حزب اللہ نے اسرائیلی فوج کے مواصلاتی نظام، جاسوسی اور نگرانی کے آلات کو نشانہ بنایا۔دوسری جانب اسرائیلی فوج کی جانب سے مغربی کنارے کے شہر جنین کا محاصرہ مسلسل تیسرے روز بھی جاری رہا۔ مقبوضہ مغربی کنارے میں بھی اسرائیلی فوج کے حملوں میں مزید 11 افراد شہید ہو گئے۔
مقبوضہ مغربی کنارے میں 65 بچوں سمیت شہید ہونے والے فلسطینیوں کی تعداد 286 سے تجاوز کر گئی ہے جب کہ اسرائیلی فوج اور انتہا پسند یہودی آباد کاروں کے حملوں میں 3 ہزار 365 سے زائد فلسطینی زخمی ہو چکے ہیں۔امریکہ کے بعد برطانیہ نے بھی مغربی کنارے میں فلسطینیوں کے خلاف تشدد میں ملوث انتہا پسند یہودی آباد کاروں پر سفری پابندیوں کا اعلان کر دیا۔واضح رہے کہ امریکی صدر جو بائیڈن نے اسرائیل کی اندھا دھند بمباری پر تشویش کا اظہار کرتے ہوئے اسرائیل کو شہریوں کی ہلاکتوں کو روکنے پر توجہ دینے کا مشورہ دیا تھا۔تاہم امریکی تشویش کے باوجود وائٹ ہاؤس کے ترجمان جیک سلیوان سے ملاقات کے بعد اسرائیلی وزیراعظم نیتن یاہو نے غزہ پر اپنے حملوں میں تیزی لائی اور غزہ میں بمباری کا نیا مرحلہ شروع کردیا۔
