اردو ورلڈ کینیڈا ( ویب نیوز ) مقبوضہ مغربی کنارے میں اسرائیلی فوج کی کارروائی کے دوران جنین پناہ گزین کیمپ میں دھماکوں سے متعدد مکانات تباہ ہو گئے۔
اسرائیلی قابض فوج نے مغربی کنارے کے شہر جنین میں پناہ گزینوں کے کیمپ میں آپریشن کے دوران متعدد عمارتوں کو تباہ کر دیا۔اسرائیلی فوج کے ترجمان نے کہا کہ جنین میں 23 عمارتوں کو دہشت گردی کے خطرات کے جواب میں تباہ کیا گیا۔اسرائیلی فوج نے مزید دعویٰ کیا ہے کہ اس نے جنوری کے وسط سے مغربی کنارے میں 50 فلسطینی جنگجوؤں کو ہلاک کیا ہے۔فلسطینی وزارت خارجہ نے جنین میں اسرائیلی فوج کی جانب سے عمارتوں کی تباہی کی مذمت کرتے ہوئے اسے وحشیانہ فعل قرار دیا۔
فلسطینی صدر محمود عباس نے جنین اور تلکرم کیمپوں میں رہائشی عمارتوں کی تباہی کو روکنے کے لیے اقوام متحدہ کی سلامتی کونسل کا ہنگامی اجلاس طلب کیا ہے۔دوسری جانب جنوبی مغربی کنارے کے علاقے اروب میں ایک اور واقعے میں اسرائیلی فورسز نے 27 سالہ محمد امجد حدوش کو شہید کردیا۔واضح رہے کہ اسرائیل نے گزشتہ ماہ آپریشن آئرن وال شروع کیا تھا جس کا مقصد مغربی کنارے بالخصوص جنین میں فلسطینی مزاحمتی گروپوں پر حملے کرنا تھا۔
