اردو ورلڈ کینیڈا( ویب نیوز ) کینیڈا میں بھارتی نژاد تاجر انکت سریواستو اور اس کے کاروباری گروپ سریواستو گروپ پر خفیہ سرگرمیوں میں ملوث ہونے کے الزامات سامنے آئے ہیں۔
میڈیارپورٹس میں کہاگیاکہ کینیڈین سیکیورٹی انٹیلی جنس سروس(سی ایس آئی ایس )اور دیگر حکام کے مطابق، یہ گروپ جعلی خبریں پھیلانے، سیاستدانوں پر اثرانداز ہونے اور بھارت کے حق میں پروپیگنڈا کرنے میں ملوث پایا گیا۔ سریواستو گروپ کا ہیڈکوارٹر کینیڈا میں واقع ہے، جبکہ اس کے دفاتر بیلجیم اور سوئٹزرلینڈ میں بھی موجود ہیں۔کینیڈین قومی سلامتی حکام کا کہنا تھا کہ سریواستو گروپ اور اس کے اعلی عہدیداران بھارتی ایجنسی را کی ہدایت پر خفیہ سرگرمیاں انجام دے رہے تھے۔سی ایس آئی ایس کی 2015 کی رپورٹ میں انکشاف کیا گیا تھا کہ سریواستو گروپ کئی جعلی ویب سائٹس چلا رہا تھا، جو نیوز آٹ لیٹس کا روپ دھار کر بھارت کے حق میں اور پاکستان کے خلاف پروپیگنڈا پھیلا رہی تھیں۔
کینیڈا کے امیگریشن حکام نے انکت سریواستو کو ملک میں داخلے سے روک دیا اور اسے کینیڈا کے لیے سنگین خطرہ قرار دیا۔کینیڈا میں الزامات سامنے آنے کے بعد سریواستو گروپ کی ویب سائٹس بند کر دی گئیں اور اس کے دفاتر خالی ہو چکے ہیں۔کینیڈین حکام کا کہنا تھا کہ سریواستو گروپ نے یورپ میں بھی بھارت کے حق میں خفیہ مہمات چلائیں جبکہ سفارتی ذرائع نے ان سرگرمیوں کو دوسرے ممالک میں بھارتی مداخلت کی واضح مثال قرار دیا ہے۔یہ انکشافات اس وقت سامنے آئے ہیں جب کینیڈا بھارتی حکومت پر دوسرے ممالک میں مداخلت اور انفارمیشن جنگ چھیڑنے کے الزامات عائد کر رہا ہے۔
