اردو ورلڈ کینیڈا ( ویب نیوز )سعودی عرب میں غیر قانونی تارکین وطن کے خلاف کام کرنے والی مشترکہ کمیٹی نے ایک ہفتے میں 25000 غیر قانونی تارکین وطن کو گرفتار کیا۔
سعودی پریس ایجنسی نے کہا کہ غیر قانونی تارکین وطن کے خلاف کام کرنے والی مشترکہ کمیٹی کے جاری کردہ ایک بیان میں کہا گیا ہے کہ یہ گرفتاریاں 13 مارچ سے 19 مارچ 2025 کے درمیان ہوئیں۔بیان میں کہا گیا ہے کہ گرفتار ہونے والوں میں سے 17،886 رہائشی قوانین کی خلاف ورزی میں ملوث تھے، 4،247 کو سرحدی قوانین کی خلاف ورزی کرنے پر گرفتار کیا گیا تھا، اور 3،017 تارکین وطن کے لیبر قوانین کی خلاف ورزی میں ملوث تھے۔مشترکہ کمیٹی نے کہا کہ اس عرصے کے دوران 1553 افراد کو بھی گرفتار کیا گیا جو سرحد پار کر کے غیر قانونی طور پر ملک میں داخل ہونے کی کوشش کر رہے تھے جن میں سے 28 فیصد یمنی، 69 فیصد ایتھوپیائی اور 3 فیصد دوسرے ممالک سے تھے۔بیان میں کہا گیا ہے کہ سعودی عرب کی سرحد عبور کرنے اور غیر قانونی طور پر ملک چھوڑنے کی کوشش کے دوران 63 افراد کو گرفتار کیا گیا۔سعودی عرب کی وزارت داخلہ نے کہا کہ غیر قانونی تارکین وطن کو کسی بھی قسم کی سہولت فراہم کرنا ایک سنگین جرم ہے جس کی سزا 15 سال قید اور 10 لاکھ ریال جرمانہ ہے۔
