اردوورلڈکینیڈا(ویب نیوز)بھارت کے خلاف “معرکۂ حق” کے ایک سال مکمل ہونے پر افواجِ پاکستان نے اپنے خصوصی پیغام میں کہا ہے کہ اس معرکے کے دوران دشمن نے پاکستان کی قوت، تیاری اور فیصلہ کن صلاحیت کا عملی مشاہدہ کیا، اور آئندہ کسی بھی مہم جوئی کا جواب پہلے سے زیادہ سخت اور مؤثر انداز میں دیا جائے گا۔
آئی ایس پی آر کے مطابق پاک افواج کے مشترکہ بیان میں کہا گیا ہے کہ معرکۂ حق نے قومی اعتماد کو نئی مضبوطی بخشی ہے اور اس نے پاک فضائیہ کی جدید جنگی تیاریوں کو عالمی سطح پر ثابت کیا ہے۔ بیان میں کہا گیا کہ پاک فضائیہ جدید ٹیکنالوجی، سمارٹ نظاموں اور بدلتے ہوئے جنگی طریقوں کے مطابق اپنی صلاحیتوں کو مسلسل بہتر بنا رہی ہے اور مستقبل کی ایک مضبوط فضائی قوت کے طور پر ابھر رہی ہے۔
مسلح افواج نے اس عزم کا اعادہ کیا ہے کہ پاکستان کے خلاف کسی بھی جارحیت یا دشمنانہ منصوبہ بندی کا جواب پہلے سے زیادہ طاقت، درستگی اور پختہ ارادے کے ساتھ دیا جائے گا۔ بیان میں کہا گیا کہ معرکۂ حق کے دوران انجام دیے گئے آپریشنز فضائی جنگ کی تاریخ میں اعلیٰ پیشہ ورانہ مہارت، منصوبہ بندی اور غیر معمولی صلاحیت کا مظہر تھے۔
آئی ایس پی آر کے مطابق پاک فضائیہ کی کامیابیوں نے نہ صرف قومی اعتماد کو تقویت دی بلکہ عوام کے حوصلے اور حب الوطنی کے جذبے کو بھی مزید مضبوط کیا۔ مسلح افواج نے کہا کہ پاکستان ایک امن پسند ملک ہے، تاہم اس کی افواج ذمہ دارانہ اور مضبوط حکمت عملی کی حامل ہیں، اور ان کی تمام تیاریوں کا مقصد خطے میں امن، استحکام اور سلامتی کو یقینی بنانا ہے۔
بیان میں مزید کہا گیا کہ پاک افواج خطے کی بدلتی ہوئی جیوپولیٹیکل صورتحال اور دشمن کی عسکری تیاریوں سے مکمل طور پر باخبر ہیں، اور اسی لیے جدید ٹیکنالوجی، پیشہ ورانہ مہارت اور دفاعی صلاحیتوں میں مسلسل سرمایہ کاری جاری ہے۔
مشترکہ بیان میں پاک فضائیہ کے تمام جوانوں، افسروں اور اہلکاروں کو خراجِ تحسین پیش کیا گیا جنہوں نے ملک کی فضائی حدود کے دفاع میں اہم کردار ادا کیا۔ کہا گیا کہ ان کی قربانی، محنت اور بروقت کارروائی قومی تاریخ کا روشن باب ہے۔
آئی ایس پی آر نے مزید کہا کہ پاک فضائیہ اپنی پیشہ ورانہ برتری اور جدید جنگی صلاحیتوں کے باعث دنیا کی نمایاں فضائی قوتوں میں شمار ہوتی ہے، اور یہ قوت آئندہ بھی اپنی برتری اور اعتماد کے ساتھ ملک کے دفاع میں کردار ادا کرتی رہے گی۔
آخر میں افواجِ پاکستان نے اس عزم کا اظہار کیا کہ پاکستان ہمیشہ زندہ باد، اور ملک کا دفاع ناقابلِ تسخیر رہے گا۔
