اردوورلڈکینیڈا(ویب نیوز)ایران اور امریکہ کے درمیان ممکنہ مذاکرات کی خبروں کے سامنے آنے کے بعد عالمی منڈی میں خام تیل کی قیمتوں میں نمایاں کمی ریکارڈ کی گئی ہے۔

تفصیلات کے مطابق برطانوی خام تیل کی قیمت میں چار فیصد کمی واقع ہوئی ہے جس کے بعد یہ تقریباً ایک سو دس ڈالر فی بیرل پر آ گیا ہے۔ اسی طرح امریکی خام تیل بھی چار فیصد کمی کے بعد ایک سو دو ڈالر فی بیرل میں فروخت ہو رہا ہے۔

دوسری جانب ابوظہبی کی تیل کمپنی کے خام تیل “مربن کروڈ” کی قیمت میں بھی کمی دیکھنے میں آئی ہے۔ یہ تیل دو فیصد سستا ہو کر تقریباً ایک سو پانچ ڈالر فی بیرل تک پہنچ گیا ہے۔

عالمی منڈی میں صرف خام تیل ہی نہیں بلکہ گیس کی قیمتوں میں بھی کمی کا رجحان دیکھا گیا ہے، جہاں گیس کی قیمتوں میں تقریباً چار فیصد تک کمی ریکارڈ کی گئی ہے۔

ماہرین کے مطابق مشرقِ وسطیٰ میں کشیدگی میں ممکنہ کمی اور سفارتی پیش رفت کی خبروں نے سرمایہ کاروں کے اعتماد کو متاثر کیا ہے، جس کے باعث عالمی توانائی منڈی میں قیمتیں نیچے آئی ہیں۔