اردوورلڈکینیڈا(ویب نیوز)کینیڈا کے صوبے البرٹا کی یونائیٹڈ کنزرویٹو حکومت نے اسکولوں کے رپورٹ کارڈز کے نظام میں یکسانیت لانے کے لیے قانون سازی متعارف کرادی ہے،
جس کے تحت صوبائی وزیر تعلیم کو رپورٹ کارڈز کے لیے باقاعدہ رہنما اصول اور ہدایات مقرر کرنے کا اختیار حاصل ہوگا۔
صوبائی وزیر تعلیم ڈیمیٹریوس نکولائیڈز نے جمعرات کو قانون سازی پیش کرتے ہوئے کہا کہ اسکولوں کے رپورٹ کارڈز کا معیار اور طریقہ کار یکساں بنانا صوبائی حکومت کی ذمہ داری ہے۔
ان کے مطابق انہیں والدین کی جانب سے ابتدائی جماعتوں میں استعمال ہونے والے مختلف گریڈنگ سسٹمز کے حوالے سے متعدد سوالات موصول ہوتے رہے ہیں۔ البرٹا کے کئی اسکول ڈویژنز میں طلبہ کی کارکردگی جانچنے کے لیے ایک سے چار تک نمبروں کا نظام رائج ہے، تاہم والدین کو اکثر یہ سمجھنے میں دشواری ہوتی ہے کہ ان نمبروں کا اصل مطلب کیا ہے اور ان کے ذریعے بچوں کی تعلیمی کارکردگی کو کس طرح جانچا جاتا ہے۔
یہ بھی پڑھیں :البرٹا کی علیحدگی کے حامی ریفرنڈم میں شکست کے بعد بھی پُرامید،رہنماؤں سے عوامی مسائل حل کرنے کا مطالبہ
وزیر تعلیم کا کہنا تھا کہ مختلف اسکولوں میں استعمال ہونے والے طریقہ کار کے باعث والدین میں الجھن پائی جاتی ہے، اس لیے رپورٹ کارڈز کے نظام کو زیادہ واضح اور قابلِ فہم بنانے کی ضرورت ہے۔
جب ان سے پوچھا گیا کہ کیا پورے صوبے میں طلبہ کی کارکردگی جانچنے کے لیے حروف پر مشتمل گریڈنگ سسٹم، مثلاً اے، بی اور سی، متعارف کرایا جائے گا تو انہوں نے کہا کہ اس حوالے سے ابھی کوئی حتمی فیصلہ نہیں کیا گیا۔
مجوزہ قانون منظور ہونے کی صورت میں صوبائی وزیر تعلیم کو رپورٹ کارڈز کے لیے یکساں اصول مرتب کرنے کا اختیار مل جائے گا، جس کا مقصد مختلف اسکول ڈویژنز میں طلبہ کی تعلیمی کارکردگی ظاہر کرنے کے طریقہ کار کو زیادہ مربوط اور واضح بنانا ہے۔
