اردوورلڈکینیڈا(ویب نیوز)کینیڈا کے شہر ٹورنٹو میں جیوری نے خود کو ’کرپٹو کنگ‘ کہنے والے ایڈن پلیٹرسکی کو 5 ہزار ڈالر سے زائد کے فراڈ کا مجرم قرار دے دیا۔ جمعرات کی صبح اونٹاریو سپیریئر کورٹ میں ہونے والی سماعت کے دوران جیوری نے اپنا فیصلہ سنایا، جس کے بعد ملزم جذباتی دکھائی دیا۔
ایڈن پلیٹرسکی نے مقدمے کی سماعت کے دوران اپنا دفاع خود کیا۔ جیوری نے جمعرات کو صبح تقریباً ساڑھے 10 بجے غور و خوض شروع کیا اور دوپہر 12 بجے سے 10 منٹ قبل ہی اپنا فیصلہ سنا دیا۔
فیصلے کے بعد عدالت نے پلیٹرسکی کو سزا کے اعلان تک گھر میں نظر بندی کی ہدایت کی ہے۔ اس کے والدین، جو فیصلے کے وقت عدالت میں موجود تھے، ضمانتی ذمہ داریاں ادا کریں گے۔
پلیٹرسکی نے سزا کے تعین سے متعلق عدالتی کارروائی کے لیے وکیل مارکو سکیارا کی خدمات بھی حاصل کرلی ہیں، جو اس سے قبل مقدمے کی سماعت ملتوی کرانے کی کوشش میں ان کی نمائندگی کر چکے ہیں۔
استغاثہ کے وکیل اسکاٹ پیٹرسن اور ایڈن پلیٹرسکی دونوں نے فیصلے کے بعد صحافیوں سے گفتگو کرنے سے انکار کردیا۔
سرمایہ کاروں کی رقم ذاتی اخراجات پر خرچ کرنے کا الزام
استغاثہ نے مقدمے کے اختتامی دلائل میں پلیٹرسکی کو چور قرار دیتے ہوئے کہا تھا کہ وہ درحقیقت کوئی کرپٹو کنگ نہیں تھا بلکہ اس نے سرمایہ کاروں سے جھوٹ بول کر ان کی رقم حاصل کی اور اپنی مرضی کے مطابق خرچ کی۔
استغاثہ کے معاون وکیل اکشے اورورا نے جیوری کو بتایا کہ پلیٹرسکی نے سرمایہ کاروں کی رقم تیزی سے خرچ کی، جبکہ سرمایہ کار اپنی رقوم کے بارے میں معلومات حاصل کرنے کے لیے مسلسل رابطے کرتے رہے لیکن انہیں جواب نہیں دیا گیا۔
عدالت کی جانب سے مجرم قرار دیے جانے کے بعد اب پلیٹرسکی کو سزا سنائے جانے کا انتظار ہے۔
