اردوورلڈکینیڈا(ویب نیوز)کینیڈا کے صوبے البرٹا کی حکومت نے پراپرٹی ٹیکس کے تعلیمی حصے میں کمی اور اس کی شرح آئندہ تین سال کے لیے منجمد کرنے کا اعلان کر دیا ہے، جس سے صوبے بھر کے ٹیکس دہندگان کو مجموعی طور پر تقریباً 100 ملین ڈالر کی بچت ہوگی۔
البرٹا کی پریمیئر ڈینیئل اسمتھ نے جمعے کو کیلگری سٹی ہال میں کابینہ کے متعدد وزرا اور کیلگری کے میئر جیرومی فرکس کے ہمراہ اس فیصلے کا اعلان کیا۔ نئی پالیسی کے تحت تعلیمی مقاصد کے لیے وصول کیے جانے والے پراپرٹی ٹیکس کی شرح پورے صوبے میں یکساں کر دی جائے گی۔
نئے نظام میں رہائشی، زرعی زمینوں اور تجارتی و دیگر غیر رہائشی جائیدادوں کے لیے صوبائی سطح پر یکساں تعلیمی ٹیکس کی شرح مقرر ہوگی۔ اس تبدیلی کے نتیجے میں گھروں اور زرعی زمینوں کے مالکان کو رواں سال کے مقابلے میں تقریباً 7 فیصد جبکہ غیر رہائشی جائیدادوں کے مالکان کو تقریباً 5 فیصد کم تعلیمی ٹیکس ادا کرنا پڑے گا۔
ڈینیئل اسمتھ کے مطابق نئی کم شدہ شرح کا اطلاق 2027 سے بلدیاتی اداروں کی جانب سے کی جانے والی جائیدادوں کی مالیت کے تعین پر ہوگا۔ آئندہ سال سے میونسپلٹیز جائیداد کی مقررہ مالیت کے مطابق نئی صوبائی تعلیمی ٹیکس شرح لاگو کریں گی۔
کیلگری میں ٹیکس اضافے پر صوبائی حکومت اور میئر کے درمیان تنازع
یہ اعلان ایسے وقت میں سامنے آیا ہے جب رواں سال کیلگری میں پراپرٹی ٹیکس میں اضافے کے معاملے پر صوبائی حکومت اور میئر جیرومی فرکس کے درمیان اختلافات پیدا ہوگئے تھے۔
یہ بھی پڑھیں:نارتھ ایسٹ کیلگری میں 170.4 ملین ڈالر کے جدید ایتھلیٹک کمپلیکس کی تعمیر کا آغاز، پاکستانی کمیونٹی کا سٹی قیادت کو خراجِ تحسین
رواں سال کیلگری کے اوسط گھر کے مالک کو پراپرٹی ٹیکس کی مد میں تقریباً 390 ڈالر اضافی ادا کرنا پڑے۔ اس میں سے صرف 49 ڈالر کیلگری سٹی کونسل کی جانب سے بلدیاتی ٹیکس میں 1.8 فیصد اضافے کے باعث تھے، جبکہ تقریباً 338 ڈالر البرٹا حکومت کی جانب سے تعلیمی ٹیکس کی شرح میں 21 فیصد اضافے کا نتیجہ تھے۔
اس وقت میئر جیرومی فرکس نے صوبائی حکومت کے اس اقدام کو البرٹا کی تاریخ میں صوبائی سطح پر پراپرٹی ٹیکس کا سب سے بڑا اضافہ قرار دیا تھا۔
جمعے کو نئے فیصلے کا خیرمقدم کرتے ہوئے میئر نے کہا کہ تعلیمی ٹیکس کی شرح میں کمی سے کیلگری کے شہریوں پر مجموعی ٹیکس کا بوجھ کم کرنے میں مدد ملے گی، خصوصاً شہر کے آئندہ چار سالہ بجٹ کی تیاری کے دوران۔
ان کے مطابق کیلگری میں جمع ہونے والے ہر ایک ڈالر کے پراپرٹی ٹیکس میں سے تقریباً 58 سینٹ شہر کے پاس رہتے ہیں جبکہ 42 سینٹ تعلیمی ٹیکس کی صورت میں صوبائی حکومت کو منتقل ہوتے ہیں۔
بعض جائیداد مالکان کو اضافی ریلیف بھی ملے گا
البرٹا حکومت نے واضح کیا ہے کہ جن بلدیاتی علاقوں میں نئی یکساں تعلیمی ٹیکس شرح موجودہ مقامی شرح سے زیادہ ہوگی، وہاں جائیداد مالکان کو 2027 میں ایک مرتبہ خصوصی ٹیکس کریڈٹ دیا جائے گا تاکہ نئے نظام کی منتقلی کے دوران اضافی مالی بوجھ سے بچایا جا سکے۔
اپوزیشن کا حکومتی اعلان مسترد، ٹیکس فریز کو جعلی قرار دے دیا
البرٹا میں اپوزیشن لیڈر ناہید ننشی نے حکومت کے اعلان کو مسترد کرتے ہوئے اسے پراپرٹی ٹیکس منجمد کرنے کا محض دکھاوا قرار دیا ہے۔
ان کا کہنا تھا کہ حکومت گزشتہ سال تعلیمی ٹیکس میں کیے گئے اضافے کو صرف جزوی طور پر واپس لے رہی ہے جبکہ نئی یکساں شرح کے ذریعے بعض دیہی علاقوں کے گھر مالکان پر اضافی مالی بوجھ منتقل کیا جا رہا ہے۔
ناہید ننشی کے مطابق البرٹا کے شہریوں کو درپیش مہنگائی اور رہائشی اخراجات کے مسائل کے حل کے لیے یہ اقدام ناکافی ہے۔
تعلیمی بجٹ متاثر نہیں ہوگا، حکومت کا مؤقف
صوبائی وزیر خزانہ جیسن نکسن نے کہا ہے کہ تعلیمی پراپرٹی ٹیکس میں کمی کے باوجود بجٹ 2026 میں اسکولوں کے لیے پہلے سے مختص فنڈنگ متاثر نہیں ہوگی۔
ان کے مطابق ٹیکس کی شرح کم ہونے سے سرکاری آمدنی میں آنے والی کمی کو حکومت اپنے عمومی مالی وسائل سے پورا کرے گی۔ انہوں نے کہا کہ رواں سال بجٹ پیش کیے جانے کے بعد صوبے کی مالی صورتحال اور آمدنی کے تخمینوں میں بہتری آئی ہے۔
البرٹا حکومت کے مالیاتی تخمینوں کے مطابق رواں موسم گرما میں 2026-27 کے مالی سال کے لیے تقریباً 2 ارب ڈالر سرپلس کی پیش گوئی کی گئی تھی، جبکہ فروری میں اسی مالی سال کے لیے 9.4 ارب ڈالر خسارے کا تخمینہ لگایا گیا تھا۔
حکومت کے مطابق مالی صورتحال میں اس نمایاں بہتری کی بڑی وجہ عالمی منڈی میں تیل کی قیمتوں میں اضافہ ہے، جسے امریکہ اور ایران کے درمیان کشیدگی نے بھی تقویت دی۔ اس کے نتیجے میں غیر قابلِ تجدید قدرتی وسائل سے حاصل ہونے والی صوبائی آمدنی میں 9.7 ارب ڈالر کا اضافہ ہوا۔
