اردوورلڈکینیڈا(ویب نیوز)الیکشن کمیشن آزاد جموں و کشمیر نے قانون ساز اسمبلی کے عام انتخابات 2026 کے لیے امیدواروں کی حتمی فہرست جاری کر دی ہے، جس کے مطابق 45 انتخابی حلقوں سے مجموعی طور پر 852 امیدوار انتخابی میدان میں ہیں۔
الیکشن کمیشن کے مطابق 320 سے زائد امیدوار اپنے کاغذاتِ نامزدگی واپس لے چکے ہیں، جس کے بعد حتمی امیدواروں کی فہرست جاری کی گئی ہے۔
اعداد و شمار کے مطابق میرپور کے 4 حلقوں سے 98، بھمبر کے 3 حلقوں سے 63 اور کوٹلی کے 6 حلقوں سے 135 امیدوار انتخابات میں حصہ لے رہے ہیں۔
اسی طرح باغ اور حویلی کے 3 حلقوں سے 83، جبکہ پونچھ اور سدھنوتی کے 7 حلقوں سے 126 امیدوار انتخابی میدان میں موجود ہیں۔
مزید برآں نیلم کے 2 حلقوں سے 51، مظفرآباد کے 5 حلقوں سے 126 اور جہلم ویلی سے 34 امیدوار مدِمقابل ہیں۔
الیکشن کمیشن کے مطابق مہاجرین جموں و کشمیر کی 12 مخصوص نشستوں پر بھی 126 امیدوار قسمت آزمائیں گے۔
کمیشن نے بتایا کہ 24 رجسٹرڈ سیاسی جماعتوں کو ان کے انتخابی نشانات الاٹ کر دیے گئے ہیں، جبکہ آزاد امیدواروں کو بھی جلد انتخابی نشانات جاری کیے جائیں گے۔
حتمی امیدواروں کی فہرست جاری ہونے کے بعد آزاد جموں و کشمیر میں انتخابی سرگرمیوں میں مزید تیزی آنے کا امکان ہے۔
