اردوورلڈکینیڈا(ویب نیوز)پاکستان پیپلز پارٹی کے چیئرمین بلاول بھٹو زرداری گلگت بلتستان میں آئندہ انتخابات کی مہم کے سلسلے میں سکردو پہنچ گئے ہیں، جہاں ان کا پرتپاک استقبال کیا گیا۔
سکردو آمد کے موقع پر مختلف سیاسی و تنظیمی رہنماؤں نے ان کا استقبال کیا جن میں پاکستان پیپلز پارٹی پارلیمنٹرینز کے سیکرٹری جنرل نیئر بخاری، پارٹی کے مرکزی سیکرٹری جنرل ہمایوں خان، گلگت بلتستان کے گورنر سید مہدی شاہ اور پنجاب کے گورنر سردار سلیم حیدر سمیت دیگر اہم شخصیات شامل تھیں۔ پارٹی کے مرکزی سیکرٹری اطلاعات ندیم افضل چن اور دیگر عہدیداران بھی اس موقع پر موجود تھے۔
پارٹی ذرائع کے مطابق بلاول بھٹو زرداری اپنے اس دورے کے دوران گلگت بلتستان کے مختلف اضلاع میں عوامی اجتماعات سے خطاب کریں گے۔ وہ آج ضلع شگر کی تحصیل گلاب پور میں ایک بڑے انتخابی جلسے سے خطاب کریں گے، جس میں آئندہ سیاسی حکمتِ عملی اور انتخابی منشور کے اہم نکات پیش کیے جانے کی توقع ہے۔
اس کے علاوہ چیئرمین پیپلز پارٹی سکردو، چلاس، غذر اور گلگت میں بھی عوامی اجتماعات سے خطاب کریں گے، جہاں وہ پارٹی امیدواروں کی حمایت میں انتخابی مہم کو مزید تیز کریں گے۔
سیاسی مبصرین کے مطابق بلاول بھٹو زرداری کا یہ دورہ گلگت بلتستان میں پارٹی کی انتخابی سرگرمیوں کو نئی رفتار دینے کے لیے اہم سمجھا جا رہا ہے، اور اس سے علاقے میں سیاسی ماحول مزید متحرک ہونے کی توقع ہے۔
