210 مریضوں کا جائزہ
پبلک ہیلتھ ایجنسی آف کینیڈا کی جانب سے گزشتہ ماہ جاری ہونے والی رپورٹ کے مطابق ادارے نے اس مبینہ بیماری سے متاثرہ سمجھے جانے والے 210 مریضوں کے طبی ریکارڈ اور دستیاب معلومات کا جائزہ لیا۔
تحقیق کے دوران متعلقہ نیورولوجسٹ سے ملاقات، مریضوں اور ان کے اہل خانہ سے مشاورت، آبادی میں بیماریوں کے رجحانات اور مریضوں کے طبی ڈیٹا کا تجزیہ کیا گیا۔
رپورٹ میں کہا گیا کہ اس تمام جائزے کے باوجود کسی غیر معمولی اعصابی بیماری یا ایسے مشترکہ طبی عارضے کا ثبوت نہیں ملا جو ان تمام مریضوں کی علامات کی وضاحت کر سکے۔
ادارے کے مطابق بیشتر مریضوں کے ریکارڈ میں تفصیلی طبی ٹیسٹ تو موجود تھے، لیکن ان نتائج کی ایسی ماہرینِ اعصاب کی تشریح دستیاب نہیں تھی جس کی بنیاد پر کسی ایک مشترکہ بیماری یا واضح طبی سنڈروم کی شناخت کی جا سکتی۔
مریضوں کی علامات تشویشناک
متاثرہ افراد نے طویل عرصے سے مختلف اعصابی علامات کی شکایات کی ہیں، جن میں بار بار دورے پڑنا، ذہنی الجھن، جسم میں غیر ارادی کھچاؤ، پٹھوں کے جھٹکے اور ہاتھ پاؤں میں کپکپی شامل ہیں۔
بعض مریضوں کی حالت اتنی خراب رہی کہ انہیں روزمرہ زندگی کے معمولات انجام دینے میں بھی مشکلات کا سامنا کرنا پڑا۔
نیوبرنزوک میں 2020 کے دوران پہلی مرتبہ ایسے مریضوں کے ایک غیر معمولی گروپ کی نشاندہی کرنے والے ڈاکٹر الیئر مارریرو نے اس سے قبل خدشہ ظاہر کیا تھا کہ جڑی بوٹیوں کو ختم کرنے والی زرعی ادویات اور جسم میں موجود بعض دھاتیں ان علامات کی ممکنہ وجہ ہو سکتی ہیں۔
انہوں نے گزشتہ سال گلوبل نیوز کو بتایا تھا کہ وہ تقریباً 400 مریضوں کا معائنہ کر چکے ہیں اور ان میں ماحولیاتی اثرات سے متعلق شواہد اور بعض نایاب خودکار مدافعتی علامات سامنے آئی ہیں۔
تاہم تازہ رپورٹ کے بعد ان کا مؤقف جاننے کے لیے رابطہ کیا گیا، لیکن خبر کی اشاعت تک ان کی جانب سے کوئی جواب موصول نہیں ہوا۔
سابقہ تحقیقات بھی بے نتیجہ
یہ پہلی مرتبہ نہیں کہ اس پراسرار بیماری کے حوالے سے تحقیق میں کسی مشترکہ مرض کے شواہد نہ ملنے کا نتیجہ سامنے آیا ہو۔
اس سے قبل صوبائی حکومت نے جنوری میں جاری کردہ اپنی رپورٹ میں بھی ایسی کسی بیماری کے شواہد نہ ملنے کا اعلان کیا تھا۔
اسی طرح 2025 میں طبی جریدے JAMA Neurology میں شائع ہونے والی ایک تحقیق میں بھی نیوبرنزوک میں کسی نئی اور مشترکہ پراسرار دماغی بیماری کے وجود کی تائید نہیں کی گئی تھی۔
متاثرہ افراد مایوس
نیوبرنزوک کے علاقے کینان اسٹیشن سے تعلق رکھنے والی سارہ نیسبٹ بھی ان مریضوں میں شامل ہیں جو طویل عرصے سے اپنی بیماری کی تشخیص اور حکومتی تحقیقات کے لیے کوششیں کر رہی ہیں۔
انہوں نے بتایا کہ وہ 2020 کے موسم گرما میں شدید بیمار ہو گئی تھیں اور 2021 میں ڈاکٹر مارریرو کے پاس بھیجی گئی تھیں۔
سارہ نیسبٹ کے مطابق متاثرہ مریضوں اور ان کے اہل خانہ نے نئی رپورٹ کو محدود اور مایوس کن قرار دیا ہے۔
انہوں نے کہا کہ ان کی سب سے بڑی امید یہ ہے کہ مریضوں کو حقیقی طبی مدد فراہم کی جائے، ان کی بیماری کی درست تشخیص ہو اور انہیں ایسا علاج مل سکے جو ان کی تکلیف کم کرنے میں مددگار ثابت ہو۔
ان کا کہنا تھا کہ کئی افراد طویل عرصے سے بغیر تشخیص اور مؤثر علاج کے زندگی گزارنے پر مجبور ہیں۔ کسی انسان کو اتنے طویل عرصے تک اس طرح تکلیف میں نہیں رہنا چاہیے۔
PHAC کی اہم وضاحت
پبلک ہیلتھ ایجنسی آف کینیڈا نے اپنی رپورٹ میں واضح کیا ہے کہ کسی نئی مشترکہ بیماری کے شواہد نہ ملنے کا ہرگز یہ مطلب نہیں کہ مریضوں کی علامات یا ان کے تجربات حقیقی نہیں ہیں۔
ادارے کے مطابق متعدد افراد اب بھی سنگین صحت کے مسائل سے دوچار ہیں اور اپنی بیماری کے بارے میں جوابات تلاش کر رہے ہیں۔
رپورٹ میں صحت کے حکام کو سفارش کی گئی ہے کہ وہ متاثرہ مریضوں سے رابطہ برقرار رکھیں، ان کا طبی فالو اَپ جاری رکھیں اور ایسے افراد کی مزید جانچ کریں جن کی بیماری کی ابھی تک تشخیص نہیں ہو سکی۔
ایجنسی کا کہنا ہے کہ فی الحال کسی نئی وسیع تحقیقات کی بنیاد موجود نہیں، تاہم نئے طبی نتائج اور تشخیصات کا جائزہ لے کر غیر یقینی صورتحال کم کی جا سکتی ہے۔
حکام کو یہ بھی ہدایت کی گئی ہے کہ مستقبل میں کسی مخصوص گروپ کے مریضوں میں مشترکہ وجہ کے نئے شواہد سامنے آنے کی صورت میں ان کا جائزہ لینے کے لیے معلومات جمع کرنے کا سلسلہ جاری رکھا جائے۔
علاج اور تشخیص کا مطالبہ
سارہ نیسبٹ نے کہا کہ انہیں اس بات سے حوصلہ ملا ہے کہ وفاقی ادارے نے صوبائی حکام کو مریضوں کی طبی دیکھ بھال بہتر بنانے اور معلومات جمع کرنے کے عمل میں مزید سنجیدگی اختیار کرنے کی سفارش کی ہے۔
اس معاملے نے کینیڈا کے صحت کے نظام میں طویل عرصے سے غیر تشخیص شدہ بیماریوں کے شکار افراد کی دیکھ بھال اور طبی تحقیقات کی اہمیت کو ایک مرتبہ پھر اجاگر کر دیا ہے۔
اگرچہ حکام کو فی الحال کسی ایک پراسرار دماغی بیماری کے شواہد نہیں ملے، لیکن متاثرہ خاندانوں کے لیے اصل سوال اب بھی برقرار ہے کہ ان کی تکالیف کی وجوہات کیا ہیں اور انہیں مؤثر علاج کب فراہم کیا جائے گا۔
