اردوورلڈکینیڈا( ویب نیوز)صوبائی دارالحکومت کے بھاٹی چوک میں ایک دلخراش واقعے میں ماں سعدیہ اور اس کی نو ماہ کی بیٹی ردا فاطمہ کھلے مین ہول میں گر گئیں، جس کے بعد واقعے کی ابتدائی رپورٹ مرتب کر لی گئی ہے۔ فیکٹ فائنڈنگ کمیٹی نے تحقیقات کے بعد بتایا کہ ٹیپا انتظامیہ نے ابتدائی طور پر غلط بریفنگ دی تھی،
جس کی وجہ سے ابتدائی ریسکیو آپریشن متاثر ہوا، تاہم بعد میں دوبارہ کارروائی کے دوران دونوں کی لاشیں برآمد کی گئیں۔ داتا دربار کے باہر موجود کیمروں اور دیگر شواہد سے پتہ چلا کہ اوپن اور غیر محفوظ مین ہول کے باعث یہ حادثہ رونما ہوا، جبکہ متعلقہ حکام نے مانیٹرنگ میں غفلت برتی۔
وزیراعلیٰ پنجاب مریم نوازشریف نے واقعے پر شدید دکھ اور غصے کا اظہار کرتے ہوئے پورے عملے کو فوری طور پر معطل کر دیا اور کہا کہ غفلت کسی صورت برداشت نہیں کی جائے گی۔ انہوں نے ذمہ دار افسران کو قرار واقعی سزا دینے اور مستقبل میں ایسے افسوسناک حادثات کی روک تھام کے لیے اقدامات کرنے کی ہدایت دی۔ ٹیپا نے بھی اس سلسلے میں مقدمہ درج کرانے کے لیے تھانہ بھاٹی دروازہ پولیس کو باضابطہ درخواست دی، جس میں منصوبے کے ٹھیکیدار اور حفاظتی ذمہ داران کو نامزد کیا گیا۔ درخواست میں بتایا گیا کہ بیریکیڈنگ، وارننگ سائنز اور مین ہول کور فراہم نہ کیے جانے کی وجہ سے عوام میں خوف و ہراس پھیلا۔
ڈی جی ایل ڈی اے نے حادثے کے بعد منصوبے پر کام کرنے والی پوری ٹیم بشمول پراجیکٹ ڈائریکٹر، ڈپٹی ڈائریکٹر، اسسٹنٹ ڈائریکٹر اور سب انجینئرز کو معطل کر دیا اور ان پر شوکاز نوٹس جاری کیے۔ اس کے علاوہ ریزیڈنٹ انجینئر نیسپاک کو بھی شوکاز نوٹس جاری کیا گیا اور ان کے کردار کی محکمانہ انکوائری کی سفارش کی گئی۔ حکام نے عوام کو یقین دلایا کہ ذمہ داران کے خلاف تعزیری کارروائی کی جائے گی اور مستقبل میں شہریوں کی حفاظت کو یقینی بنانے کے لیے مضبوط اقدامات کیے جائیں گے تاکہ ایسے دلخراش حادثات دوبارہ نہ ہوں۔
