اردوورلڈکینیڈا(ویب نیوز)آزاد کشمیر قانون ساز اسمبلی کے انتخابات کے دوسرے مرحلے میں مسلم لیگ (ن) نے میدان مار لیا۔ غیر حتمی اور غیر سرکاری نتائج کے مطابق مظفر آباد ڈویژن اور مہاجرین کی نشستوں پر ن لیگ سب سے بڑی جماعت بن کر سامنے آئی ہے۔
رات گئے تک موصول ہونے والے نتائج کے مطابق مسلم لیگ (ن) نے 13 نشستوں پر کامیابی حاصل کی جبکہ پاکستان پیپلز پارٹی 5 نشستیں جیتنے میں کامیاب رہی۔
دوسرے مرحلے میں مظفر آباد ڈویژن کی 8 اور مہاجرین کی 12 نشستوں پر پولنگ ہوئی، تاہم بعض حلقوں میں خراب موسم اور لینڈ سلائیڈنگ کے باعث پولنگ کا عمل متاثر بھی ہوا۔
موسم نے کچھ پولنگ اسٹیشن متاثر کیے
مظفر آباد ڈویژن کے حلقہ ایل اے 28 مظفر آباد 2 لچھراٹ کے متعدد پولنگ اسٹیشنز پر موسم کی خرابی اور راستوں کی بندش کے باعث پولنگ ملتوی کردی گئی۔الیکشن کمیشن کے ترجمان کے مطابق نوسیری نوسدہ، پنجگراں، دیولیاں اور پنجکوٹ کے مخصوص پولنگ اسٹیشنز پر انتخابی عملہ اور پولنگ سامان نہ پہنچنے کے باعث پولنگ 4 اگست تک مؤخر کی گئی۔ترجمان کے مطابق ملتوی کیے گئے پولنگ اسٹیشنز کے سیل شدہ بیگز ریٹرننگ افسران نے واپس حاصل کرلیے ہیں۔
نیلم ویلی میں مقابلہ سخت
حلقہ ایل اے 25 نیلم ویلی 1 سے مسلم لیگ (ن) کے شاہ غلام قادر کامیاب قرار پائے جبکہ پیپلز پارٹی کے امیدوار دوسرے نمبر پر رہے۔ سابق وزیراعظم آزاد کشمیر سردار تنویر الیاس اس حلقے سے شکست کھا گئے اور تیسرے نمبر پر رہے۔
ایل اے 26 نیلم ویلی 2 میں 135 میں سے 26 پولنگ اسٹیشنز کے غیر حتمی نتائج کے مطابق پیپلز پارٹی کے میاں عبدالوحید 3762 ووٹ لے کر آگے جبکہ مسلم لیگ (ن) کے شاہ غلام قادر 3296 ووٹ کے ساتھ دوسرے نمبر پر تھے۔
مظفر آباد میں پیپلز پارٹی اور ن لیگ کا مقابلہ
حلقہ ایل اے 29 مظفر آباد سے پاکستان پیپلز پارٹی کے سردار مختار 19 ہزار 792 ووٹ لے کر کامیاب ہوگئے۔ایل اے 30 مظفر آباد 4 کے تمام 129 پولنگ اسٹیشنز کے نتائج کے مطابق مسلم لیگ (ن) کے مصطفیٰ بشیر عباسی نے 18 ہزار 82 ووٹ لے کر کامیابی حاصل کی جبکہ پیپلز پارٹی کے مبشر منیر اعوان 11 ہزار 947 ووٹ کے ساتھ دوسرے نمبر پر رہے۔
ایل اے 31 سے مسلم لیگ (ن) کے ثاقب مجید کامیاب قرار پائے جبکہ ایل اے 32 مظفر آباد سے سابق وزیراعظم آزاد کشمیر راجہ فاروق حیدر خان نے 17 ہزار 507 ووٹ لے کر کامیابی حاصل کی۔ ان کے مدمقابل پیپلز پارٹی امیدوار نے 13 ہزار 964 ووٹ حاصل کیے۔ایل اے 33 میں پیپلز پارٹی کے دیوان علی قمر چغتائی 19 ہزار 521 ووٹ لے کر کامیاب ہوگئے۔
مہاجرین نشستوں پر بھی ن لیگ کا غلبہ
لاہور سے ایل اے 34 جموں 1 میں مسلم لیگ (ن) کے ناصر ڈار کامیاب رہے۔ایل اے 35 جموں 2 میں مسلم لیگ (ن) کے چوہدری اسماعیل گجر نے 23 ہزار 893 ووٹ لے کر بھاری اکثریت سے کامیابی حاصل کی۔
ایل اے 36 جموں 3 کے تمام پولنگ اسٹیشنز کے غیر حتمی نتائج کے مطابق ن لیگ کے حافظ احسن رضا 27 ہزار 218 ووٹ لے کر کامیاب ہوئے جبکہ پیپلز پارٹی کے چوہدری احسن اسماعیل گجر ایڈووکیٹ 12 ہزار 980 ووٹ کے ساتھ دوسرے نمبر پر رہے۔ایل اے 37 جموں 4 میں مسلم لیگ (ن) کی مریم جاوید 28 ہزار 664 ووٹ لے کر کامیاب ہوئیں۔
گجرات اور وزیرآباد میں بھی ن لیگ کامیاب
ایل اے 38 جموں 5 میں مسلم لیگ (ن) کے امیدوار چوہدری ذیشان یونس کامیاب قرار پائے۔ انہوں نے 17 ہزار 565 ووٹ حاصل کیے جبکہ مسلم لیگ (ق) کے امیدوار چوہدری اکبر ابراہیم 13 ہزار 837 ووٹ کے ساتھ دوسرے نمبر پر رہے۔وزیرآباد کے اسی حلقے کے نتائج میں بھی ن لیگ کے ذیشان یونس ٹانڈا کامیاب رہے۔
ایل اے 39 جموں 6 کے ابتدائی نتائج کے مطابق مسلم لیگ (ن) کے راجہ محمد صدیق 10 ہزار 981 ووٹ لے کر کامیاب ہوگئے جبکہ پیپلز پارٹی کے چوہدری فخر زمان 5081 ووٹ کے ساتھ دوسرے نمبر پر رہے۔
کشمیر ویلی کی نشستیں
ایل اے 40 کشمیر ویلی 1 سے پیپلز پارٹی کے عامر عبدالغفار 2914 ووٹ لے کر کامیاب ہوئے۔ایل اے 41 کشمیر ویلی 2 میں مسلم لیگ (ن) کے محمد عامر شاہ نے 1804 ووٹ لے کر کامیابی حاصل کی۔
ایل اے 42 کشمیر ویلی 3 میں مسلم لیگ (ن) کے سید شوکت علی شاہ 1542 ووٹ لے کر کامیاب ہوئے جبکہ پیپلز پارٹی کے محمد عاصم شریف دوسرے نمبر پر رہے۔
راولپنڈی کے حلقہ ایل اے 43 ویلی 4 میں مسلم لیگ (ن) کے یاسین لون 1276 ووٹ لے کر کامیاب ہوئے جبکہ ایل اے 44 ویلی 5 میں ن لیگ کے احمد رضا قادری نے 2308 ووٹ لے کر کامیابی حاصل کی۔ایل اے 45 کشمیر ویلی 6 سے پاکستان پیپلز پارٹی کے عبدالماجد خان 3448 ووٹ لے کر کامیاب ہوگئے۔
غیر حتمی نتائج کے مطابق دوسرے مرحلے میں مسلم لیگ (ن) نے واضح برتری حاصل کرتے ہوئے آزاد کشمیر اسمبلی میں اپنی پوزیشن مزید مضبوط کرلی ہے، تاہم حتمی نتائج کا اعلان الیکشن کمیشن کی جانب سے کیا جائے گا۔
