اردوورلڈکینیڈا(ویب نیوز)ایرانی صدر مسعود پزشکیان نے امریکی صدر ڈونلڈ ٹرمپ کی حالیہ دھمکیوں پر سخت ردعمل دیتے ہوئے کہا ہے کہ ایران اپنے وطن کے ایک ایک انچ کا ہر قیمت پر دفاع کرے گا۔
سرکاری ٹی وی پر نشر ہونے والے اپنے بیان میں مسعود پزشکیان نے امریکی صدر کی بیان بازی کو تنقید کا نشانہ بناتے ہوئے کہا کہ ڈونلڈ ٹرمپ بتائیں کہ کیا وہ میدانِ جنگ میں اپنے مقاصد حاصل کرنے میں کامیاب ہوئے؟ انہوں نے سوال اٹھایا کہ ایران کو تقسیم کرنے کی کوشش کرنے والوں کو آخر کیا حاصل ہوا؟
ایرانی صدر نے کہا کہ ایران اپنے اقدامات کے ذریعے اپنے وطن کے ایک ایک انچ کا دفاع کرے گا اور ملکی خودمختاری پر کوئی سمجھوتہ نہیں کیا جائے گا۔
ادھر ایرانی پارلیمنٹ کی قومی سلامتی کمیٹی کے ترجمان ابراہیم رضائی نے کہا کہ دشمن مفاہمتی یادداشت کی تمام شقوں کی خلاف ورزی کرتے ہوئے باقاعدہ جنگ میں داخل ہو چکا ہے، اس لیے اب کوئی مفاہمتی یادداشت مؤثر نہیں رہی۔
دوسری جانب ایرانی پارلیمنٹ نے آبنائے ہرمز کی سلامتی اور پائیدار ترقی کے لیے اسٹریٹجک ایکشن پلان بھی منظور کر لیا ہے۔
