41

اردوورلڈکینیڈا(ویب نیوز)کینیڈا کی وزیر خارجہ انیتا آنند نے امریکی شہر اٹلانٹا میں جی 20 وزرائے خارجہ کے اجلاس کے دوران اپنے روسی ہم منصب سرگئی لاوروف کو آڑے ہاتھوں لیتے ہوئے یوکرین جنگ میں روس کے مبینہ جنگی جرائم، توانائی اور غذائی سپلائی متاثر کرنے اور بحیرہ اسود میں بحری جہازوں پر حملوں کا معاملہ براہ راست اٹھا دیا۔

انیتا آنند نے جمعے کو اجلاس کے موقع پر بتایا کہ وہ سرگئی لاوروف کے بالکل سامنے بیٹھی تھیں اور انہوں نے آنکھوں میں آنکھیں ڈال کر واضح الفاظ میں کہا کہ روس نے یوکرین کے خلاف جنگ میں ہولناک جرائم کیے ہیں، جن میں عالمی توانائی اور غذائی رسد کے نظام کو تباہ کن نقصان پہنچانا بھی شامل ہے۔

کینیڈین وزیر خارجہ نے کہا کہ روس کو امریکی میزبانی میں ہونے والے جی 20 اجلاس میں شرکت ہی نہیں کرنی چاہیے تھی، تاہم انہوں نے اس موقع کو روسی وزیر خارجہ کے سامنے کینیڈا کا مؤقف واضح کرنے کے لیے استعمال کیا۔

لاوروف کا جوابی وار، یورپی یونین پر غلامی اور بحری قزاقی کے الزامات

انیتا آنند کے مطابق سرگئی لاوروف نے جواب میں روسی حکومت کا مؤقف دہراتے ہوئے کہا کہ ماسکو توانائی کو سیاسی مقاصد کے لیے استعمال نہیں کرتا۔

لاوروف نے یورپی یونین پر روسی جہازوں کو قبضے میں لینے کے معاملے پر غلامی اور بحری قزاقی جیسے الزامات بھی عائد کیے۔ ان جہازوں کا تعلق روس کے اس نام نہاد شیڈو فلیٹ سے بتایا جاتا ہے جو اپنی اصل شناخت چھپا کر روسی تیل کی برآمدات میں استعمال ہوتا ہے۔

انیتا آنند نے کہا کہ انہوں نے روس کی جانب سے یوکرینی بچوں کو اغوا کرنے اور بحیرہ اسود میں بحری جہازوں پر حملوں کا معاملہ بھی اٹھایا۔

دوسری جانب سرگئی لاوروف نے پریس کانفرنس میں مغربی ممالک پر تنقید کرتے ہوئے کہا کہ انہیں روس کے ساتھ سنجیدہ مذاکرات میں کوئی دلچسپی نہیں بلکہ ان کی تمام تر توجہ صرف اس بات پر ہے کہ ان کی تصویر لاوروف کے ساتھ نہ بنائی جائے۔

روسی وزیر خارجہ کے ساتھ تصویر سے انکار، اجلاس میں روایتی گروپ فوٹو بھی منسوخ

امریکی میزبانی میں ہونے والے جی 20 اجلاس میں اس مرتبہ ایک غیر معمولی فیصلہ بھی دیکھنے میں آیا، جب یورپی سفارت کاروں کے روسی وزیر خارجہ کے ساتھ تصویر کھنچوانے پر اعتراض کے بعد تمام شرکا کی روایتی اجتماعی تصویر منسوخ کر دی گئی۔

انیتا آنند نے بتایا کہ وہ مونٹریال میں یورپی یونین کے حکام کے ساتھ ملاقاتوں کے بعد اٹلانٹا پہنچی تھیں اور اس وقت تک اجتماعی تصویر کا مرحلہ طے شدہ وقت کے مطابق گزر چکا تھا۔انہوں نے واضح کیا کہ وہ کسی بھی صورت سرگئی لاوروف کے ساتھ تصویر نہیں کھنچوانا چاہتی تھیں۔

بحیرہ اسود اور آبنائے ہرمز میں بحری سلامتی کا معاملہ اٹھا دیا

کینیڈین وزیر خارجہ کے مطابق جی 20 کے تقریباً تمام رکن ممالک کے لیے سمندری راستوں کی سلامتی ایک اہم تشویش بن چکی ہے۔

یہ بھی پڑھیں :اونٹاریو میں ڈیجیٹل شناختی کارڈ متعارف کرانے کا فیصلہ، ڈرائیونگ لائسنس اور ہیلتھ کارڈ بھی موبائل فون پر دستیاب ہوں گے

انہوں نے کہا کہ بحیرہ اسود میں روسی حملوں کے باعث یوکرین کے اناج بردار جہازوں کی ترسیل متاثر ہو رہی ہے، جس کا نقصان ان ترقی پذیر ممالک کو بھی اٹھانا پڑ رہا ہے جو غذائی ضروریات کے لیے یوکرینی اناج پر انحصار کرتے ہیں۔

انیتا آنند نے آبنائے ہرمز کی صورتحال کا بھی حوالہ دیا، جہاں ایران نے تہران کے خلاف امریکی جنگ کے جواب میں اہم بحری گزرگاہ سے جہازوں کی آمدورفت میں نمایاں کمی کر دی ہے۔

ان کا کہنا تھا کہ جی 20 کی اصل طاقت مشترکہ نکات پر اتفاق رائے پیدا کرنے میں ہے۔ آبنائے ہرمز میں جہازوں کی آزادانہ آمدورفت اور بحیرہ اسود میں کھاد لے جانے والے جہازوں کے محفوظ گزرنے کی ضرورت پر لاوروف کے سوا کسی کو اختلاف نہیں ہونا چاہیے۔

انہوں نے جی 20 ممالک پر زور دیا کہ وہ اپنی توانائی کی ضروریات پوری کرنے کے لیے کینیڈا کو ایک قابل اعتماد شراکت دار کے طور پر دیکھیں۔

امریکا کی جنوبی افریقہ کو جی 20 سے باہر رکھنے کی مخالفت

انیتا آنند نے جی 20 اجلاسوں کی امریکی میزبانی کے دوران جنوبی افریقہ کو خارج رکھنے کی کوشش کی بھی مخالفت کی۔

امریکی حکومت کی جانب سے جنوبی افریقہ میں سفید فام شہریوں کی نسل کشی سے متعلق دعوے کیے گئے ہیں، جنہیں کینیڈا کی وزیر خارجہ نے مسترد کرتے ہوئے کہا کہ جنوبی افریقہ کو جی 20 اجلاسوں میں موجود ہونا چاہیے۔

ان کے مطابق کینیڈا اور جنوبی افریقہ دونوں ایک ایسے مؤثر، جامع اور فعال جی 20 کے حامی ہیں جو عالمی اقتصادی مسائل سے نمٹنے کی صلاحیت رکھتا ہو۔

کینیڈا کی عالمی سفارتی سرگرمیاں تیز، دولتِ مشترکہ کے اجلاس میں شرکت کی تیاری

انیتا آنند نے کہا کہ کینیڈا حالیہ دنوں میں عالمی سطح پر انتہائی مصروف سفارتی سرگرمیوں میں حصہ لے رہا ہے۔ مونٹریال میں کینیڈا اور یورپی یونین کا اہم سربراہی اجلاس، کئی دہائیوں بعد کینیڈا کی پہلی قومی سلامتی حکمت عملی کا اجرا اور آئندہ دولتِ مشترکہ کا سربراہی اجلاس اسی سفارتی سرگرمیوں کا حصہ ہیں۔

انہوں نے کہا کہ یہ مختصر عرصے میں سفارت کاری کی غیر معمولی سرگرمی ہے، جس میں عالمی سطح پر کینیڈا کو کئی اہم کامیابیاں حاصل ہوئی ہیں۔

کینیڈین وزیر خارجہ دولتِ مشترکہ کے سربراہی اجلاس میں شرکت کے لیے انٹیگوا اور باربوڈا روانہ ہوں گی جبکہ وزیراعظم مارک کارنی بھی پیر کو اس اجلاس میں شریک ہوں گے۔

انیتا آنند کے مطابق کینیڈا جمہوریت کے حوالے سے دولتِ مشترکہ کے مضبوط اور قابل اعتماد کردار کی حمایت کرتا ہے، جس میں دولتِ مشترکہ کا وزارتی ایکشن گروپ بھی اہم کردار ادا کرتا ہے۔ یہ ادارہ انسانی حقوق سے متعلق معاملات کا جائزہ لیتا ہے۔