پاکستان کے فیلڈ مارشل سید عاصم منیر اور شہباز شریف مسلم دنیا کی با اثر شخصیات میں نمبر ون قرا ر

  اردو ورلڈ کینیڈا ( ویب نیوز ) دنیا کی 500 بااثر مسلم شخصیات کی سالانہ فہرست ’دی مسلم 500‘ کے 2027 ایڈیشن میں وزیراعظم شہباز شریف اور چیف آف ڈیفنس فورسز فیلڈ مارشل عاصم منیر کو مشترکہ طور پر پہلی پوزیشن کے اعزاز سے نوازا گیا ہے۔
اس اعزاز میں سعودی عرب کے فرمانروا شاہ سلمان بن عبدالعزیز، ولی عہد محمد بن سلمان اور ترکیہ کے صدر رجب طیب اردوان بھی شامل ہیں۔ یوں پاکستان، سعودی عرب اور ترکیہ کی پانچ اہم شخصیات کو اس مرتبہ خصوصی طور پر مشترکہ نمبر ون قرار دیا گیا ہے۔
دی مسلم 500 کا 2027 ایڈیشن جاری
اردن کے رائل اسلامک اسٹریٹجک اسٹڈیز سینٹر (RISSC) کی جانب سے شائع ہونے والی ’دی مسلم 500‘ کا 2027 ایڈیشن اس سلسلے کی اٹھارہویں سالانہ اشاعت ہے۔
اس مرتبہ فہرست میں ایک منفرد تبدیلی کرتے ہوئے پانچ عالمی رہنماؤں کو مشترکہ طور پر سرفہرست رکھا گیا ہے۔ اشاعت میں ان شخصیات کے اثر و رسوخ کو مسلم دنیا کے سیاسی، دفاعی اور تزویراتی منظرنامے کے تناظر میں اجاگر کیا گیا ہے۔
پاکستان، سعودی عرب اور ترکیہ کی قیادت مشترکہ نمبر ون
فہرست کے خصوصی مضمون ’جوائنٹ نمبر ون‘ میں وزیراعظم شہباز شریف، فیلڈ مارشل عاصم منیر، سعودی فرمانروا شاہ سلمان بن عبدالعزیز، ولی عہد محمد بن سلمان اور ترک صدر رجب طیب اردوان کو مشترکہ طور پر پہلی پوزیشن دینے کی وجوہات بیان کی گئی ہیں۔
ادارے کے مطابق ان رہنماؤں کو نمایاں کرنے کی بنیادی وجہ پاکستان، سعودی عرب اور ترکیہ کے درمیان دفاعی اور تزویراتی تعاون کا فروغ ہے۔
مشترکہ دفاعی معاہدہ اہم وجہ قرار
اشاعت کے خصوصی مضمون میں 7 اگست 2026 کو طے پانے والے مکہ مشترکہ دفاعی معاہدے کو اس فیصلے کی اہم بنیاد قرار دیا گیا ہے۔
رپورٹ کے مطابق اس معاہدے نے پاکستان، سعودی عرب اور ترکیہ کے درمیان اجتماعی دفاعی تعاون کے نئے امکانات پیدا کیے ہیں۔ تینوں ممالک کی عسکری صلاحیت، مالی وسائل اور دفاعی ٹیکنالوجی کو باہمی تعاون کے اہم ستونوں کے طور پر پیش کیا گیا ہے۔
شہباز شریف اور عاصم منیر کے کردار کو سراہا گیا
پاکستانی قیادت کے حوالے سے اشاعت میں وزیراعظم شہباز شریف کے سیاسی کردار اور معاہدے کے لیے ضروری حکومتی و انتظامی اقدامات کو نمایاں کیا گیا ہے۔
دوسری جانب فیلڈ مارشل عاصم منیر کے حوالے سے پاکستان کی عسکری صلاحیت اور علاقائی دفاعی تعاون میں ان کے کردار کو اہمیت دی گئی ہے۔
اس طرح پاکستان کی سیاسی اور عسکری قیادت کو ایک ہی اعزاز میں شامل کرکے ملک کے علاقائی اور عالمی اثر و رسوخ کو اجاگر کیا گیا ہے۔
ٹاپ 50 کی فہرست میں مختلف درجہ بندی
کتاب کے ٹاپ 50 کے ابتدائی چارٹ میں سعودی قیادت کو پہلے نمبر پر، پاکستانی قیادت کو دوسرے نمبر پر جبکہ ترک صدر رجب طیب اردوان کو تیسرے نمبر پر درج کیا گیا ہے۔
تاہم کتاب کے خصوصی مضمون ’جوائنٹ نمبر ون‘ اور اس حصے میں شامل شخصیات کی تصاویر میں پانچوں رہنماؤں کو مشترکہ طور پر پہلی پوزیشن پر رکھا گیا ہے۔
مجتبیٰ خامنہ ای چوتھے اور مفتی تقی عثمانی ساتویں نمبر پر
’دی مسلم 500‘ کے 2027 ایڈیشن میں ایرانی سپریم لیڈر مجتبیٰ خامنہ ای کو چوتھا نمبر دیا گیا ہے، جبکہ اردن کے فرمانروا شاہ عبداللہ دوم پانچویں اور قطر کے امیر شیخ تمیم بن حمد آل ثانی چھٹے نمبر پر ہیں۔
پاکستان کے معروف عالم دین مفتی محمد تقی عثمانی اس فہرست میں ساتویں پوزیشن حاصل کرنے میں کامیاب رہے ہیں۔
دیگر عالمی شخصیات میں ملائیشیا کے وزیراعظم انور ابراہیم تیرہویں اور انڈونیشیا کے صدر پرابووو سوبیانتو سولہویں نمبر پر شامل ہیں۔
دیگر پاکستانی شخصیات بھی فہرست کا حصہ
’دی مسلم 500‘ میں پاکستان سے تعلق رکھنے والی متعدد دیگر نمایاں شخصیات کو بھی شامل کیا گیا ہے۔
ان میں معروف مذہبی اسکالر مولانا طارق جمیل، تبلیغی جماعت کے امیر مولانا نذرالرحمٰن اور مولانا محمد الیاس عطار قادری کے نام قابل ذکر ہیں۔
پاکستان کی مختلف مذہبی، سماجی، سیاسی اور ثقافتی شخصیات کی شمولیت ملک کی مسلم دنیا میں مختلف شعبوں کے حوالے سے نمائندگی کو ظاہر کرتی ہے۔
بااثر مسلم شخصیات کے انتخاب کا معیار کیا ہے؟
رائل اسلامک اسٹریٹجک اسٹڈیز سینٹر کے مطابق ’دی مسلم 500‘ میں کسی شخصیت کے اثر و رسوخ کا تعین صرف اس کے سرکاری عہدے یا موجودہ مقبولیت کی بنیاد پر نہیں کیا جاتا۔
اس کے بجائے مذہبی، سیاسی، معاشی، سماجی، علمی اور ثقافتی شعبوں میں اس کے اثرات کو بھی مدنظر رکھا جاتا ہے۔
شخصیات کے انتخاب کے لیے ماہرین کی آرا، عوامی تجاویز اور مختلف سماجی اشاریوں سے مدد لی جاتی ہے، جبکہ کسی شخصیت کی زندگی بھر کی خدمات اور معاشرے پر اس کے مجموعی اثرات کو بھی اہمیت دی جاتی ہے۔
500 سے زائد مسلم شخصیات مختلف شعبوں میں شامل
اس اشاعت میں دنیا بھر سے 500 سے زائد بااثر مسلم شخصیات کو شامل کیا گیا ہے۔ ان میں ابتدائی 50 شخصیات کو باقاعدہ درجہ بندی دی جاتی ہے، جبکہ دیگر شخصیات کو ان کے متعلقہ شعبوں کے تحت پیش کیا جاتا ہے۔
ان شعبوں میں مذہبی علوم، سیاست، مذہبی انتظام، دعوت و تبلیغ، فلاحی سرگرمیاں، سائنس و ٹیکنالوجی، کاروبار، میڈیا، فنون اور کھیل شامل ہیں۔
’دی مسلم 500‘ کا مقصد دنیا بھر میں مسلم شخصیات کے اثر و رسوخ اور مختلف شعبوں میں ان کی خدمات کو نمایاں کرنا ہے۔ 2027 کے ایڈیشن میں پاکستان کی سیاسی اور عسکری قیادت کو ملنے والی مشترکہ پہلی پوزیشن ملک کے لیے ایک اہم عالمی اعزاز کے طور پر سامنے آئی ہے۔

ہمیں فالو کریں

[uw_related_posts]