اردوورلڈکینیڈا(ویب نیوز)بلوچستان کے اضلاع قلات اور گوادر میں سکیورٹی فورسز کی کارروائیوں کے دوران چار دہشت گرد ہلاک ہوگئے، جبکہ ضلع گوادر کی تحصیل پسنی میں کلیئرنس آپریشن کے دوران دیسی ساختہ بم کے دھماکے میں پاک فوج کے میجر وجاہت وحید نے جامِ شہادت نوش کرلیا۔
پاک فوج کے شعبۂ تعلقاتِ عامہ (آئی ایس پی آر) کے مطابق انٹیلی جنس اداروں کو قلات کے علاقے جٹک آباد اور گوادر کی تحصیل پسنی کے علاقے شادی کور میں بھارتی سرپرستی میں سرگرم تنظیم فتنہ الہندوستان کے متعدد ٹھکانوں کی موجودگی کی اطلاع ملی تھی۔ ان ٹھکانوں سے مقامی آبادی کو خطرات لاحق تھے۔
قلات میں انٹیلی جنس آپریشن، 4 دہشت گرد ہلاک
آئی ایس پی آر کے مطابق 18 اکتوبر 2026 کو سکیورٹی فورسز نے قلات کے علاقے جٹک آباد میں خفیہ اطلاعات کی بنیاد پر کارروائی کی۔ آپریشن کے دوران دہشت گردوں کے ٹھکانے کو مؤثر انداز میں نشانہ بنایا گیا، جس کے بعد شدید فائرنگ کا تبادلہ ہوا۔
کارروائی کے نتیجے میں چار دہشت گرد ہلاک ہوگئے۔ سکیورٹی فورسز نے جائے وقوعہ سے اسلحے اور گولہ بارود کا بڑا ذخیرہ بھی برآمد کیا۔
یہ بھی پڑھیں :ملک کے بالائی علاقوں میں شدید برفباری، نظام زندگی مفلوج، ریسکیو آپریشن جاری
پسنی میں دھماکا، میجر وجاہت وحید شہید
آئی ایس پی آر کے مطابق گوادر کی تحصیل پسنی کے علاقے شادی کور میں دہشت گردوں کے خاتمے اور علاقے کو محفوظ بنانے کے لیے کلیئرنس آپریشن جاری تھا کہ اس دوران سکیورٹی فورسز کے دستے کو دیسی ساختہ دھماکہ خیز مواد (آئی ای ڈی) سے نشانہ بنایا گیا۔
دھماکے کے نتیجے میں دستے کی قیادت کرنے والے میجر وجاہت وحید شہید ہوگئے۔ 34 سالہ میجر وجاہت وحید کا تعلق لاہور سے تھا۔ انہوں نے مادرِ وطن کے دفاع اور اپنے فرائض کی ادائیگی کے دوران جان قربان کردی۔
سکیورٹی فورسز کی جانب سے علاقے میں کلیئرنس آپریشن جاری ہے تاکہ دہشت گردوں کے ممکنہ ٹھکانوں کا خاتمہ اور مقامی آبادی کی حفاظت یقینی بنائی جاسکے۔
