اردوورلڈکینیڈا(ویب نیوز)امریکا کے نائب صدر جے ڈی وینس نے کہا ہے کہ صدر ڈونلڈ ٹرمپ ایران کے ساتھ جاری فوجی تنازع کو طویل اور لامتناہی جنگ میں تبدیل نہیں ہونے دیں گے۔ ان کا کہنا ہے کہ بیرونِ ملک طویل فوجی مداخلتوں کی مخالفت کا مطلب یہ نہیں کہ امریکا ہر قسم کی فوجی طاقت کے استعمال سے دستبردار ہوجائے۔
ریاست ٹیکساس کے شہر فورٹ ورتھ میں ووٹرز کے ساتھ سوال و جواب کی نشست کے دوران گفتگو کرتے ہوئے جے ڈی وینس نے مشرقِ وسطیٰ میں امریکی فوجی پالیسی کا دفاع کیا اور کہا کہ وہ خطے میں فوجی مہم جوئی کے حوالے سے امریکی عوام کی مایوسی کو سمجھتے ہیں۔
انہوں نے عراق میں اپنی فوجی خدمات کا حوالہ دیتے ہوئے کہا کہ وہ خود مشرقِ وسطیٰ میں امریکی فوجی مداخلتوں کے تجربات سے گزر چکے ہیں اور عوام کے تحفظات سے بخوبی آگاہ ہیں۔
47 سال سے ایران کے معاملے سے نمٹ رہا ہے امریکا
جے ڈی وینس نے کہا کہ امریکا گزشتہ 47 برس سے ایران کے معاملے سے نمٹ رہا ہے، جبکہ گزشتہ تقریباً سات ماہ سے بھی کسی نہ کسی شکل میں ایران کے معاملے میں مصروف ہے۔
یہ بھی پڑھیں :اسلام آباد مفاہمتی یادداشت مسترد کرنے پر ایران کی ٹرمپ پر تنقید، امریکی سفارت کاری پر سوالات اٹھا دیے
انہوں نے امریکی عوام کو یقین دہانی کرائی کہ ڈونلڈ ٹرمپ اس معاملے کو ایسی لامتناہی جنگ میں تبدیل نہیں ہونے دیں گے جس میں امریکا طویل عرصے تک الجھا رہے۔
فوجی طاقت کے استعمال کو مکمل طور پر مسترد نہیں کیا جاسکتا
امریکی نائب صدر نے واضح کیا کہ بیرونِ ملک طویل فوجی جنگوں کی مخالفت کا مطلب یہ نہیں کہ امریکا اپنے مقاصد کے حصول کے لیے فوجی طاقت استعمال کرنے سے مکمل طور پر گریز کرے۔
ان کے مطابق صدر ٹرمپ امریکی اہداف حاصل کرنے کے لیے اقدامات کریں گے اور اس کے بعد امریکی حکومت اپنی دیگر اہم ترجیحات پر توجہ مرکوز کرسکے گی۔
جے ڈی وینس کے بیان سے ظاہر ہوتا ہے کہ ٹرمپ انتظامیہ ایک طرف طویل جنگ میں الجھنے سے گریز کا مؤقف پیش کر رہی ہے تو دوسری جانب ایران کے معاملے میں فوجی طاقت کے استعمال کے امکان کو بھی مسترد نہیں کر رہی۔
