ishtiaq ahmed 
اردو ورلڈ کینیڈا ( ویب نیوز)ملک بھر میں 9 محرم الحرام انتہائی عقیدت و احترام کے ساتھ منایا جا رہا ہے اور کسی بھی ناخوشگوار واقعے سے بچنے کے لیے خصوصی طور پر جلوسوں کے راستوں پر سخت حفاظتی انتظامات کیے گئے ہیں۔
محرم ساتویں صدی کی جنگ کربلا میں نواسہ رسول حضرت امام حسین رضی اللہ عنہ، ان کے اہل خانہ اور ساتھیوں کی شہادت کے سوگ کا مہینہ ہے۔
کراچی میں مرکزی جلوس نشتر پارک سے دوپہر ایک بجے شروع ہوگا، ایم اے جناح روڈ، صدر کی ایمپریس مارکیٹ، تبت سینٹر سے ہوتا ہوا کھارادر میں حسینیہ ایرانی امام بارگاہ پر اختتام پذیر ہوگا۔
روہڑی میں نو ڈھلہ تعزیہ کا 500 سال پرانا تاریخی جلوس روایتی راستے پر رواں دواں ہے۔
لاہور میں مرکزی جلوس پانڈو سٹریٹ اسلام پورہ سے شروع ہو کر مقررہ راستوں سے ہوتا ہوا پانڈو سٹریٹ پر اختتام پذیر ہو گا۔
اسلام آباد میں مرکزی جلوس مرکزی امام بارگاہ اشنا عشری سیکٹر G-6/2 سے برآمد ہوگا اور اپنے روایتی راستوں سے ہوتا ہوا اسی مقام پر اختتام پذیر ہوگا۔
پشاور کا جلوس امام بارگاہ حسینیہ ہال سے صبح 10 بجے روانہ ہوگا اور کوئٹہ میں مرکزی جلوس میکانگی روڈ سے دوپہر 1:30 بجے روانہ ہوگا۔
ملک بھر میں سیکیورٹی کے سخت انتظامات کیے گئے ہیں اور کئی شہروں میں موبائل سروس بھی جزوی طور پر معطل کردی گئی ہے۔
