اردوورلڈکینیڈا(ویب نیوز)ایئر کینیڈا کی نیوارک، نیو جرسی سے ہیلی فیکس جانے والی ایک پرواز کو اس وقت ہنگامی طور پر بوسٹن کا رخ کرنا پڑا جب دورانِ پرواز کپتان کی طبیعت اچانک خراب ہو گئی۔
ایئر کینیڈا کی جانب سے جاری بیان میں کہا گیا ہے کہ بدھ کی سہ پہر فلائٹ AC7664، جسے علاقائی شراکت دار PAL Airlines چلا رہی تھی، کے کپتان کو دورانِ پرواز طبی مسئلہ پیش آیا۔ حفاظتی ضوابط کے مطابق انہیں فوری طور پر کاک پٹ سے ہٹا دیا گیا۔
بیان کے مطابق فرسٹ آفیسر نے فوری طور پر طیارے کا کنٹرول سنبھال لیا اور پرواز کا رخ بوسٹن کی جانب موڑ دیا، جہاں طیارہ بحفاظت لینڈ کر گیا۔
ایئر کینیڈا نے اپنے بیان میں کہا، "پائلٹس کو اس بات کی مکمل تربیت دی جاتی ہے کہ وہ ضرورت پڑنے پر دوسرے پائلٹ کی مدد کے بغیر بھی طیارے کو محفوظ طریقے سے اڑا اور اتار سکیں۔”ایئر لائن کے مطابق ڈی ہیویلینڈ Q400 طیارے میں اس وقت 61 مسافر سوار تھے۔
کپتان کو بوسٹن پہنچنے پر فوری طبی امداد کے لیے اسپتال منتقل کر دیا گیا، جبکہ متاثرہ مسافروں کے لیے متبادل سفری انتظامات کیے جا رہے ہیں۔
آن لائن فلائٹ ٹریکر کے مطابق طیارہ دوپہر 12:55 بجے (مشرقی وقت) نیوارک سے روانہ ہوا تھا اور تقریباً ایک گھنٹے بعد بوسٹن میں لینڈ کر گیا۔ پرواز کے ٹیک آف کے تقریباً 30 منٹ بعد طیارے نے اپنی بلندی کم کرنا شروع کر دی تھی۔واضح رہے کہ نیوارک سے ہیلی فیکس کی معمول کی پرواز کا دورانیہ تقریباً 2 گھنٹے 15 منٹ ہوتا ہے۔
دریں اثنا، بوسٹن کے لوگن انٹرنیشنل ایئرپورٹ کی ایئر ٹریفک کنٹرول کی آڈیو ریکارڈنگز میں کنٹرولرز کو دیگر پائلٹس کو آگاہ کرتے ہوئے سنا گیا کہ رن وے 27 پر ایک ہنگامی پرواز کی آمد کے باعث عارضی طور پر آپریشن متاثر ہو سکتا ہے۔
کنٹرولر نے ایک آنے والے طیارے کو بتایا کہ ہنگامی طیارے کو لینڈنگ کے بعد رن وے خالی کرنے میں دشواری پیش آ سکتی ہے، اس لیے احتیاط برتی جائے۔
بوسٹن لوگن انٹرنیشنل ایئرپورٹ کی ترجمان نے بتایا کہ ایئر کینیڈا کا طیارہ کسی بھی ناخوشگوار واقعے کے بغیر بحفاظت لینڈ کر گیا، جبکہ ماس پورٹ فائر ریسکیو اور بوسٹن ایمرجنسی میڈیکل سروسز (EMS) نے ضرورت کے مطابق عملے کو طبی امداد فراہم کی۔
