ishtiaq ahmed 
اردو ورلڈ کینیڈا ( ویب نیوز)وزیراعلیٰ پنجاب حمزہ شہباز نے خواتین کو اسکوٹیز، نوجوانوں کو لیپ ٹاپ اور مریضوں کو مفت ادویات دینے کا اعلان کیا ہے۔
ایوان اقبال میں پنجاب اسمبلی کے بجٹ اجلاس سے خطاب کرتے ہوئے حمزہ شہباز نے عمران خان پر تنقید کرتے ہوئے کہا کہ آپ اپنی انا کی خاطر جمہوری نظام، اداروں کو تباہ کرنا چاہتے ہیں، ہم ہسپتالوں میں مفت ادویات اور لیپ ٹاپ سکیم دوبارہ شروع کر رہے ہیں۔
اس کے علاوہ سیف سٹی اتھارٹی کے ناقص کیمروں کی تبدیلی اور اس کا دائرہ کار وسیع کیا جائے گا۔
صرف غریب اور مستحق افراد کے لیے ہیلتھ کارڈ سکیم جاری رکھنے کا اعلان کرتے ہوئے حمزہ شہباز نے کہا کہ وہ امیروں سے وسائل لے کر غریبوں پر خرچ کریں گے۔ ہم خواتین اور اساتذہ کو عزت دینے میں کوئی کسر نہیں چھوڑیں گے۔ کام کرنے والی خواتین کو ان کی سہولت کے لیے اسکوٹیز دئیے جائیں گے۔
وزیراعلیٰ پنجاب نے کہا کہ نیا پنجاب لوکل باڈیز ایکٹ اختیارات کو نچلی سطح پر منتقل کر دے گا۔ یونین کونسل کے ملازمین کو مستقل کرنے کے ساتھ ساتھ نئی بھرتیاں بھی کی جائیں گی۔
