ishtiaq ahmed 
اردو ورلڈ کینیڈا ( ویب نیوز )کراچی میں بارش ،وزیراعظم نے وزیراعلیٰ سندھ سے رابطہ کرکے کراچی میں بارش کے بعد کی صورتحال پر ہر ممکن تعاون کی پیشکش کی ہے۔
ٹوئٹر پر جاری بیان میں وزیراعظم شہباز شریف نے کہا کہ انہوں نے وزیراعلیٰ سندھ مراد علی شاہ سے ٹیلی فون پر بات کی ہے اور کراچی میں بارش کے بعد کی صورتحال پر سندھ حکومت کو ہر ممکن تعاون کی پیشکش کی ہے۔
وزیراعظم نے کہا کہ وہ کراچی میں شدید بارشوں سے غمزدہ ہیں اور امید کرتے ہیں کہ وزیراعلیٰ سندھ کی قابل قیادت میں سندھ حکومت زندگی کو معمول پر لائے گی۔
دوسری جانب وزیراعظم نے این ڈی ایم اے کو صوبائی حکومتوں اور پی ڈی ایم اے کے ساتھ مل کر کام کرنے کی ہدایت کی۔
وزیراعظم نے کہا کہ انہوں نے صوبائی حکومتوں اور این ڈی ایم اے کو طوفانی بارشوں سے عوام کی حفاظت کو یقینی بنانے کی ہدایت کی ہے۔
متاثرہ افراد کو عارضی رہائش اور خوراک کی فراہمی کو یقینی بنایا جائے۔
شہباز شریف نے کہا کہ کراچی سمیت ملک کے دیگر حصوں میں ہلاکتوں پر دکھ ہے، کرنٹ لگنے جیسے واقعات کی روک تھام کے لیے ہنگامی بنیادوں پر اقدامات کیے جائیں۔
