اردو ورلڈ کینیڈا ( ویب نیوز ) کینیڈا کی سیکیورٹی انٹیلی جنس سروس (CSIS) کے ڈائریکٹر ڈین راجرز کا اوٹاوا میں پہلا عوامی خطاب
اپنے خطاب میں انہوں نے ان چار ممالک کے بارے میں خبردار کیا جن سے کینیڈا کو سب سے بڑے قومی سلامتی کے خطرات لاحق ہیں: روس، چین، ایران اور بھارت۔ انہوں نے کہا کہ روس کینیڈا کے آرکٹک خطے، حکومتی اداروں اور نجی شعبے پر جاسوسی کر رہا ہے، جبکہ اس کے خفیہ نیٹ ورکس کینیڈین ٹیکنالوجی اور تجارتی سامان مختلف فرنٹ کمپنیوں کے ذریعے غیر قانونی طور پر حاصل کر کے روس منتقل کر رہے ہیں، جہاں یہ اشیا یوکرین سمیت دیگر مقامات پر روسی فوجی سرگرمیوں میں استعمال ہوتی ہیں۔
چین کے بارے میں ڈائریکٹر نے بتایا کہ اس کی فوجی و انٹیلی جنس ایجنسیاں کینیڈا کی حساس سرکاری معلومات تک رسائی حاصل کرنے کی کوشش کر رہی ہیں، ساتھ ہی وہ آرکٹک خطے میں اسٹریٹجک اور معاشی اثر و رسوخ بڑھانے کے لیے سرگرم ہے۔ دوسری جانب ایران کے خفیہ اداروں نے گزشتہ سال کینیڈا میں مقیم ایسے کئی افراد کو نشانہ بنانے کی کوشش کی جنہیں وہ اپنے سیاسی مخالف سمجھتے ہیں۔ راجرز کے مطابق سی ایس آئی ایس نے متعدد ممکنہ طور پر ’مہلک‘ کارروائیوں کو بروقت ناکام بنایا۔
بھارت کے حوالے سے ڈین راجرز نے کہا کہ نئی دہلی ٹرانس نیشنل ریپریشن میں ملوث ہے، اور کارکنوں، صحافیوں اور مذہبی و ثقافتی گروہوں کے افراد کو دھمکانے، نگرانی کرنے اور انہیں خاموش کرانے کی کارروائیوں میں شریک ہے۔ انہوں نے کہا کہ ایسے اقدامات نہ صرف متاثرہ افراد کی زندگیوں پر گہرے اثرات چھوڑتے ہیں بلکہ پوری کمیونٹیز کو خوف زدہ کر کے ان کے جمہوری حقوق کو متاثر کرتے ہیں۔
ڈائریکٹر نے یہ بھی انکشاف کیا کہ کینیڈا کو شدت پسندی کے بڑھتے ہوئے رجحان سے بھی شدید خطرات لاحق ہیں، جن میں نسل پرستی، مذہبی انتہا پسندی، یہود دشمنی، زن دشمنی اور افراتفری پر مبنی نظریات شامل ہیں۔ انہوں نے بتایا کہ شدت پسند سرگرمیوں میں ملوث افراد کی عمر تشویشناک حد تک کم ہو رہی ہے، اور ہر 10 میں سے 1 کیس میں کم از کم ایک مشتبہ شخص کی عمر 18 سال سے کم ہے۔ 2014 سے اب تک ملک میں 20 بڑے حملے ہو چکے ہیں جن میں 29 افراد ہلاک ہوئے، جبکہ 2022 سے اب تک دو درجن منصوبہ بند حملے ناکام بنائے گئے ہیں۔
راجرز نے کہا کہ موجودہ عالمی ماحول انتہائی غیر یقینی اور تیزی سے بدل رہا ہے، جہاں ریاستیں معاشی فوائد اور عالمی اثر و رسوخ کے لیے جارحانہ حکمت عملی اپنا رہی ہیں۔ انہوں نے زور دیا کہ کینیڈا کی شراکتیں قانون کی بالادستی اور قومی خودمختاری کے احترام پر مبنی ہونی چاہئیں۔ ان کے بقول غیر ملکی ریاستوں کی جانب سے مداخلت کا مقابلہ کرنے کے لیے مضبوط دفاعی، انٹیلی جنس اور سفارتی اقدامات ناگزیر ہو چکے ہیں۔
