اردوورلڈ کینیڈا( ویب نیوز)سکردو کے علاقے کندوس میں کلاؤڈ برسٹ کے بعد آنے والے شدید سیلاب نے بڑے پیمانے پر تباہی مچائی، جس کے نتیجے میں متعدد سیاح اور مقامی افراد متاثر ہوئے۔مقامی ذرائع کے مطابق سیلابی ریلے سے 49 مکانات، 20 دکانیں اور دو مساجد مکمل طور پر تباہ ہو گئیں۔
علاقے کا مواصلاتی نظام درہم برہم ہو گیا جبکہ رابطہ پل بھی بہہ جانے سے زمینی روابط مکمل طور پر منقطع ہو چکے ہیں۔
سب ڈویژن ڈغونی میں شدید بارش کے نتیجے میں ایک گھر کی چھت گر گئی، جس سے ایک لڑکی جاں بحق ہو گئی۔ دشوار گزار راستوں اور منقطع راستوں کے باعث امدادی کاموں میں شدید مشکلات کا سامنا ہے، تاہم کارروائیاں جاری ہیں۔
یہ واقعہ ایسے وقت میں پیش آیا جب دو روز قبل ضلع دیامر میں بھی کلاؤڈ برسٹ کے باعث سیلاب اور لینڈ سلائیڈنگ سے تباہی ہوئی تھی، جس میں لودھراں سے تعلق رکھنے والے ایک ڈاکٹر، ان کے دیور اور سسر جاں بحق ہوئے تھے جبکہ ان کا بیٹا تاحال لاپتا ہے۔
ریسکیو ٹیموں نے فوری کارروائی کرتے ہوئے 200 سے زائد سیاحوں کو بچا کر چلاس منتقل کیا۔ دیامر میں آٹھ کلومیٹر طویل سڑک بھی لینڈ سلائیڈنگ کی وجہ سے تباہ ہو چکی ہے۔
ادھر نیشنل ڈیزاسٹر مینجمنٹ اتھارٹی (NDMA) کی رپورٹ کے مطابق حالیہ بارشوں سے مختلف حادثات میں جاں بحق افراد کی تعداد 252 ہو چکی ہے، جن میں 121 بچے، 85 مرد اور 46 خواتین شامل ہیں۔ گزشتہ 24 گھنٹوں میں مزید 10 افراد جاں بحق اور 13 زخمی ہوئے۔
پنجاب میں سب سے زیادہ 139 اموات رپورٹ ہوئیں، خیبرپختونخوا میں 60، سندھ میں 24 اور بلوچستان میں 16 افراد جان سے ہاتھ دھو بیٹھے۔ملک بھر میں شدید بارشوں اور سیلاب کے باعث ہنگامی صورتحال ہے، اور متاثرہ علاقوں میں فوری امداد و بحالی کے اقدامات کا مطالبہ زور پکڑ رہا ہے۔
