اس اقدام کا مقصد محنتی ملازمین کو متحدہ عرب امارات میں ہونے والے ہائی پروفائل میچز براہِ راست دیکھنے کا موقع فراہم کرنا ہے۔غیر ملکی خبر رساں ادارے کے مطابق ڈانوب گروپ کے وائس چیئرمین  انیس سجن نے مقامی میڈیا سے گفتگو میں بتایا کہ انہوں نے یہ ٹکٹس اپنے ملازمین کے لیے خریدے ہیں تاکہ وہ ایشیا کپ کے پرجوش مقابلے گراؤنڈ میں جا کر دیکھ سکیں۔یاد رہے کہ دبئی میں قائم ڈانوب گروپ ریئل اسٹیٹ کے شعبے سے وابستہ ہے، اور اس سے قبل بھی کھیلوں کے فروغ کے لیے مختلف اقدامات کرتا رہا ہے۔ کمپنی کے مطابق اس بار ٹکٹس خریدنے کا فیصلہ صرف اس لیے کیا گیا کہ ملازمین اپنے روزمرہ کے کاموں سے ہٹ کر کھیل سے لطف اندوز ہوں۔

انیس سجن نے مزید بتایا کہ کمپنی نے 100 ٹکٹس پاک بھارت گروپ اسٹیج میچ کے لیے مختص کیے ہیں، جو ایشیا کپ کا سب سے زیادہ دلچسپ مقابلہ سمجھا جا رہا ہے۔ اسی طرح  100 ٹکٹس سپر فور مرحلےکے لیے اور 100 ٹکٹس فائنل میچ کے لیے بھی مخصوص کیے گئے ہیں۔کمپنی کے ذرائع کے مطابق اس اقدام پر ملازمین میں خوشی کی لہر دوڑ گئی ہے اور وہ بے صبری سے ایشیا کپ کے بڑے مقابلے دیکھنے کے منتظر ہیں۔