اردوورلڈکینیڈا( ویب نیوز)خیبر پختونخوا میں دو وزراء کے استعفوں کے بعد کابینہ میں ردوبدل کیا گیا ہے جس کے تحت سات ارکان کے محکمے تبدیل کردیے گئے ہیں۔

ذرائع کے مطابق وزیراعلیٰ خیبر پختونخوا علی امین گنڈاپور نے رات گئے کابینہ میں تبدیلیوں کی منظوری دی۔ اس فیصلے کے تحت معاون خصوصی محمد عاصم کو محکمہ تعلیم جبکہ اسرار کو آبپاشی کا قلمدان سونپا گیا ہے۔ یاد رہے کہ فیصل تراکئی نے وزارت تعلیم اور عاقب اللہ نے وزارت آبپاشی سے استعفیٰ دے دیا تھا۔

تبدیلیوں کے بعد صوبائی وزیر خلیق الرحمان کو محکمہ صحت اور مشیر صحت احتشام علی کو محکمہ ایکسائز دیا گیا ہے۔ فضل شکور کو سیاحت، مشیر سیاحت زاہد چن زیب کو لیبر، جبکہ صوبائی وزیر پبلک ہیلتھ انجینئرنگ پختون یار کو کھیل کا محکمہ سونپ دیا گیا ہے۔

اسی طرح وزیر کھیل سید فخر جہاں کو پبلک ہیلتھ انجینئرنگ کا قلمدان دیا گیا ہے اور معاون خصوصی ہاؤسنگ ڈاکٹر امجد علی کو صوبائی وزیر مقرر کیا گیا ہے۔ اس کے علاوہ حامد الرحمان کو معاون خصوصی بنایا گیا ہے۔