اردوورلڈکینیڈا( ویب نیوز)اسلام آباد کی اسپیشل سینٹرل عدالت میں توشہ خانہ 2 کیس کی سماعت اڈیالہ جیل میں ہوئی، جس میں بانی پی ٹی آئی عمران خان اور ان کی اہلیہ بشریٰ بی بی کو عدالت کے روبرو پیش کیا گیا۔
سماعت کے دوران استغاثہ کے آخری گواہ محسن ہارون پر عمران خان کے وکیل قوسین فیصل مفتی نے جرح مکمل کی۔ پراسیکیوشن کی جانب سے عدالت کو تحریری طور پر آگاہ کیا گیا کہ گواہی کا عمل مکمل ہوچکا ہے۔
جج شاہ رخ ارجمند نے ملزمان کو ضابطہ فوجداری کی دفعہ 342 کے تحت 29 سوالات پر مشتمل سوالنامہ فراہم کیا اور انہیں آئندہ سماعت پر اپنے جوابات جمع کرانے کی ہدایت دی۔ عدالت نے واضح کیا کہ یہ عمران خان اور بشریٰ بی بی کے لیے اپنی بے گناہی ثابت کرنے کا آخری موقع ہے۔
عدالت نے وکلائے صفائی کو ہدایت دی کہ وہ 8 اکتوبر کو اپنے مؤکلین کے جوابات جمع کرائیں، جبکہ ملزمان کو اپنے دفاع میں گواہ پیش کرنے کی بھی اجازت دی گئی۔
سماعت کے دوران سینیٹر علی ظفر، سینیٹر مشال یوسف زئی، بیرسٹر سلمان اکرم راجا، بیرسٹر سیف اور عمران خان کی بہنیں بھی موجود تھیں۔
وفاقی اور اسپیشل پراسیکیوشن ٹیم، جن میں ذوالفقار عباس نقوی، بلال بٹ، بیرسٹر عمیر مجید اور شہروز گیلانی شامل تھے، عدالت میں پیش ہوئے۔ کیس کی سماعت 8 اکتوبر تک ملتوی کردی گئی
