اردوورلڈکینیڈا(ویب نیوز)محکمۂ موسمیات پاکستان کے مطابق ملک بھر میں آج سے بارشوں کا نیا سلسلہ شروع ہونے کا امکان ہے جو چار مئی تک جاری رہ سکتا ہے۔ اس دوران ملک کے بالائی اور وسطی علاقوں میں تیز آندھیوں کے ساتھ بارش کی پیشگوئی کی گئی ہے جبکہ بعض علاقوں میں پانچ مئی تک مغربی ہواؤں کا سلسلہ برقرار رہنے کا امکان ہے۔
دارالحکومت اسلام آباد میں وقفے وقفے سے آندھی اور بارش متوقع ہے۔ اسی طرح خیبر پختونخوا، پنجاب اور بلوچستان کے مختلف اضلاع میں بھی بارشوں کی پیشگوئی کی گئی ہے، جبکہ آزاد کشمیر اور گلگت بلتستان میں بھی بارش کا امکان ظاہر کیا گیا ہے۔محکمۂ موسمیات کے مطابق سکھر، لاڑکانہ، دادو اور جیکب آباد میں آج اور کل بارش ہونے کا امکان ہے۔
دوسری جانب پی ڈی ایم اے خیبر پختونخوا نے بھی الرٹ جاری کرتے ہوئے کہا ہے کہ دو مئی سے چار مئی کے دوران صوبے کے بالائی اور وسطی اضلاع میں تیز ہواؤں اور گرج چمک کے ساتھ بارشیں ہو سکتی ہیں۔ ادارے کے مطابق بالائی علاقوں جیسے چترال، دیر، سوات، شانگلہ، کوہستان، بونیر، مالاکنڈ، بٹگرام، مانسہرہ اور ایبٹ آباد میں بارش کے ساتھ ژالہ باری کا بھی امکان ہے۔
اسی طرح پشاور، مردان، نوشہرہ، چارسدہ، صوابی، کوہاٹ، کرم، اورکزئی، خیبر، باجوڑ، مہمند، بنوں، لکی مروت، ڈیرہ اسماعیل خان اور ٹانک میں بھی تیز بارش اور آندھی کی پیشگوئی کی گئی ہے۔
پی ڈی ایم اے کے مطابق بارشوں کے باعث بالائی علاقوں میں لینڈ سلائیڈنگ، جبکہ ندی نالوں میں طغیانی کا خطرہ موجود ہے۔ میدانی علاقوں خصوصاً پشاور، مردان اور نوشہرہ میں شہری سیلاب (اربن فلڈنگ) کا خدشہ بھی ظاہر کیا گیا ہے، جس کے پیش نظر متعلقہ اداروں کو الرٹ رہنے کی ہدایت کی گئی ہے۔
