اردوورلڈکینیڈا(ویب نیوز)پاکستان نے امریکی نشریاتی ادارے سی بی ایس نیوز کی اُس رپورٹ کو سختی سے مسترد کر دیا ہے جس میں نور خان ایئربیس پر ایرانی طیاروں کی موجودگی کے حوالے سے گمراہ کن اور سنسنی خیز دعوے کیے گئے تھے۔
دفترِ خارجہ کے مطابق اس نوعیت کی قیاس آرائیوں پر مبنی بیانیہ خطے میں جاری امن اور استحکام کی کوششوں کو نقصان پہنچانے کے لیے گھڑا گیا معلوم ہوتا ہے۔
بیان میں کہا گیا ہے کہ جنگ بندی کے بعد اور اسلام آباد مذاکرات کے ابتدائی مرحلے کے دوران ایران اور امریکہ سے متعدد طیارے پاکستان پہنچے، جن کا مقصد مذاکراتی عمل سے وابستہ سفارتی عملے، سکیورٹی ٹیموں اور انتظامی عملے کی نقل و حرکت کو سہولت فراہم کرنا تھا۔
دفترِ خارجہ کے مطابق بعض طیارے اور معاون عملہ آئندہ ممکنہ مذاکراتی مراحل کی تیاری کے سلسلے میں عارضی طور پر پاکستان میں موجود رہا۔
مزید کہا گیا ہے کہ اگرچہ باضابطہ مذاکرات ابھی دوبارہ شروع نہیں ہوئے، تاہم اعلیٰ سطح پر سفارتی روابط مسلسل جاری ہیں۔ اسی تناظر میں ایرانی وزیرِ خارجہ کے اسلام آباد دوروں کو بھی موجودہ انتظامی اور لاجسٹک سہولیات کے تحت ممکن بنایا گیا۔
بیان میں واضح کیا گیا کہ پاکستان میں موجود ایرانی طیاروں کا کسی بھی فوجی ہنگامی صورتحال یا سکیورٹی آپریشن سے کوئی تعلق نہیں، اور اس کے برعکس کیے گئے دعوے محض قیاس آرائیوں پر مبنی اور حقائق کے منافی ہیں۔
دفترِ خارجہ نے کہا کہ پاکستان ہمیشہ ایک غیر جانبدار، تعمیری اور ذمہ دار سہولت کار کے طور پر مکالمے اور کشیدگی میں کمی کی حمایت کرتا آیا ہے، اور اسی کردار کے تحت جہاں ضرورت پڑی انتظامی اور لاجسٹک تعاون فراہم کیا گیا۔
آخر میں وزارتِ خارجہ نے اپنے مؤقف کو دہراتے ہوئے کہا کہ پاکستان خطے میں امن، استحکام اور سلامتی کے فروغ اور بامعنی مذاکرات کے لیے ہر مخلصانہ کوشش کی حمایت جاری رکھے گا۔
