اردو ورلڈ کینیڈا ( ویب نیوز ) ڈسٹرکٹ اینڈ سیشن کورٹ نے ٹک ٹاکر ثنا یوسف قتل کیس کے ملزم عمر حیات کو سزائے موت سناتے ہوئے 24 لاکھ روپے جرمانہ بھی عائد کیا۔
عدالت نے جرم ثابت ہونے پر عمر حیات کو مجموعی طور پر 30 سال قید کی سزا بھی دی۔ایڈیشنل سیشن جج افضل مجوکہ نے محفوظ فیصلہ سناتے ہوئے کہا کہ دیگر دفعات کے تحت ملزم کو اضافی سزائیں بھی دی جائیں گی، جن میں ڈکیتی اور گھر میں گھسنے کی دفعات شامل ہیں، ہر ایک کے لیے 10 سال قید کا حکم دیا گیا۔
سماعت کے دوران عدالت میں ملزم کی کالز اور چیٹ اسکرین شاٹس پیش کیے گئے، جبکہ ملزم نے صحت جرم سے انکار کیا اور کہا کہ اس کا مقتولہ ثنا یوسف سے کوئی رابطہ نہیں تھا۔ جج نے دوران تفتیش سامنے آنے والے شواہد پر سوال کیا، جس پر ملزم نے کہا کہ وہ اپنے وکیل کے بغیر جواب نہیں دے سکتے۔ملزم کے وکیل نے عدالت سے استدعا کی کہ ذاتی رنجش یا سماجی دباؤ کی بنیاد پر سزائے موت نہ دی جائے، مگر جج نے کہا کہ عدالت کو گمراہ نہیں کیا جا سکتا۔واضح رہے کہ ثنا یوسف کو 2 جون 2025 کو اسلام آباد میں ان کے گھر قتل کیا گیا تھا، اور عمر حیات کو 3 جون 2025 کو جڑانوالہ سے گرفتار کیا گیا۔
