اردوورلڈکینیڈا(ویب نیوز)پاکستان تحریک انصاف کے چیئرمین بیرسٹر گوہر خان نے کہا ہے کہ خیبرپختونخوا کے وزیرِاعلیٰ یا پارٹی کے اندر کسی قسم کا فارورڈ بلاک موجود نہیں اور تمام ارکان مکمل طور پر ایک ہی قیادت کے تحت متحد ہیں۔

نجی ٹی وی سے گفتگو کرتے ہوئے انہوں نے کہا کہ پارٹی ایک جمہوری جماعت ہے، اس لیے ارکان کو اختلافِ رائے کا حق حاصل ہے، تاہم تمام فیصلے باہمی مشاورت اور اتفاقِ رائے سے کیے جائیں گے۔

بیرسٹر گوہر کے مطابق حالیہ اجلاس میں تمام متعلقہ اراکین موجود تھے، صرف وہ ارکان غیر حاضر تھے جو بیرونِ ملک تھے۔ ان کا کہنا تھا کہ یہ حکومت کسی ایک شخص کی نہیں بلکہ بانی کی قیادت میں چلنے والی حکومت ہے۔

انہوں نے واضح کیا کہ سہیل آفریدی کو بانی کی مکمل حمایت حاصل ہے اور پارٹی ان کے ساتھ کھڑی ہے۔ ان کے مطابق تمام ارکانِ اسمبلی وزیرِاعلیٰ سہیل آفریدی کی حمایت کر رہے ہیں اور انہیں ہر سطح پر سیاسی و تنظیمی پشت پناہی حاصل رہے گی۔

چیئرمین کے مطابق پارٹی کے اندر اتحاد قائم ہے اور کسی قسم کی تقسیم یا اختلافی گروپ بندی کی خبریں درست نہیں۔