اردوورلڈکینیڈا ( ویب نیوز)نگران وزیراعظم کی کرسی پر کون بیٹھے گا؟ نگراں وزیراعظم کی تقرری کے حوالے سے آج وزیراعظم شہباز شریف اور اپوزیشن لیڈر راجہ ریاض کے درمیان ملاقات کا فیصلہ کیا گیا۔
ذرائع کے مطابق وزیراعظم اور اپوزیشن لیڈر کے درمیان ملاقات دوپہر 2 بجے وزیراعظم ہاؤس میں ہوگی، راجہ ریاض کو وزیراعظم ہاؤس کی جانب سے آگاہ کیا گیا۔
اجلاس میں وزیراعظم شہباز شریف نگراں وزیراعظم کے لیے 3 نام اپوزیشن لیڈر کو پیش کریں گے جب کہ راجہ ریاض بھی نگراں وزیراعظم کے لیے 3 نام پیش کریں گے۔
اس کے علاوہ اتحادیوں نے نگراں وزیراعظم کے لیے اپنے اپنے نام تجویز کیے ہیں، ایم کیو ایم نے نگراں وزیراعظم کے لیے کامران ٹیسوری کا نام دیا ہے جب کہ نیشنل پارٹی نے جسٹس (ر) شکیل بلوچ کا نام تجویز کیا ہے۔
نگراں وزیراعظم کے لیے سابق سیکریٹری خارجہ جلیل عباس جیلانی، حفیظ شیخ، جسٹس (ر) افتخار جیلانی، جسٹس (ر) مقبول باقر کے ناموں پر مشاورت جاری ہے جب کہ فواد حسن فواد، ذوالفقار مگسی، ڈاکٹر عشرت العباد کے نام زیر غور ہیں۔
ذرائع کے مطابق نگراں وزیراعظم کے لیے سابق سیکر ٹری خارجہ جلیل عباس جیلانی سب سے مضبوط امیدوار ہیں، جلیل عباس جیلانی کا نام پیپلز پارٹی نے تجویز کیا، سابق سینئر سفارت کار جلیل عباس جیلانی کا نام آصف زرداری نے نواز شریف کے سامنے رکھا۔
نواز شریف اور آصف زرداری کی بیرون ملک ملاقات میں جلیل عباس جیلانی کے نام پر غور کیا گیا، مسلم لیگ (ن) کے رہنما نے جلیل عباس جیلانی کے نام پر اعتراض نہیں کیا۔
دوسری جانب نگراں وزیراعظم کے لیے کسی نام پر اتفاق نہ ہونے کی صورت میں معاملہ پارلیمانی کمیٹی کو بھجوایا جائے گا
