اردوورلڈ کینیڈا ( ویب نیوز)انسداد دہشت گردی کی عدالت نے سابق صوبائی وزیر ڈاکٹر یاسمین راشد کا 5 روزہ جسمانی ریمانڈ منظور کرلیا۔
لاہور کی انسداد دہشت گردی کی عدالت میں شیرپاؤ پل پر جلاؤ گھیراؤ اور اشتعال انگیز تقاریر کیس میں پولیس نے ڈاکٹر یاسمین راشد کو پیش کیا، جج ابھر گل خان نے پولیس کی درخواست پر سماعت کی۔
درخواست میں دلیل دی گئی کہ مقدمے میں بغاوت، جنگ چھیڑنے اور عوام کو فسادات پر اکسانے کی دفعات شامل کی گئی ہیں۔

انسداد دہشت گردی کی عدالت نے پولیس کی استدعا منظور کرتے ہوئے ڈاکٹر یاسمین راشد کا 5 روزہ جسمانی ریمانڈ منظور کرتے ہوئے انہیں 14 ستمبر کو دوبارہ پیش کرنے کا حکم دے دیا۔
واضح رہے کہ تھانہ سرور روڈ پولیس نے ڈاکٹر یاسمین راشد کے خلاف مقدمہ درج کر رکھا ہے۔
ادھر لاہور کی انسداد دہشت گردی کی عدالت نے تھانہ شادمان میں درج آتش زنی اور محاصرے کے مقدمے میں گرفتار 6 ملزمان کو جوڈیشل ریمانڈ پر جیل بھیج دیا۔
جسمانی ریمانڈ مکمل ہونے پر شاد مان پولیس نے گرفتار 6 ملزمان کو عدالت میں پیش کیا تاہم عدالت نے مزید جسمانی ریمانڈ کی استدعا مسترد کرتے ہوئے 6 ملزمان کو جوڈیشل ریمانڈ پر جیل بھیج دیا، ملزمان میں ارباز، عبدالحفیظ، فہیم ، قیصر، طاہر خان محمد گل اور غلام عباس شامل ہیں۔