Imran 
اردو ورلڈ کینیڈا ( ویب نیوز ) اسرائیل اور لبنان کے درمیان جنگ کا خطرہ ہے۔یورپی یونین کی خارجہ پالیسی کے سربراہ جوزپ بوریل نے لبنانی وزیر خارجہ عبداللہ بوہبیب کے ساتھ مشترکہ پریس کانفرنس کے دوران غزہ میں جنگ کو فوری طور پر ختم کرنے کا مطالبہ کیا۔انہوں نے مزید کہا کہ یورپی ممالک کو غزہ کی جنگ جاری رہنے کے باعث خطے میں انسانی مصائب کے پھیلاؤ پر تشویش ہے، انہوں نے غزہ میں شہریوں کی ہلاکت کی مذمت کا اعادہ کیا اور جنگ کے فوری خاتمے کا مطالبہ کیا۔
انہوں نے متنبہ کیا کہ مشرق وسطیٰ میں کشیدگی کے لبنان اور اس کے عوام کے لیے بڑے منفی اثرات مرتب ہوئے ہیں، انہوں نے کہا کہ جنگ نے ہزاروں شہریوں کو جنوبی لبنان میں بلیو لائن کے علاقے میں نقل مکانی پر مجبور کیا۔انہوں نے تمام لبنانی رہنماؤں پر زور دیا کہ وہ کسی بھی پارٹی کے مفاد کے بجائے عوام کے مفاد میں کام کریں۔ لبنانی وزیر خارجہ نے سلامتی کونسل کی قرارداد 1701 کے نفاذ پر زور دیتے ہوئے کہا کہ لبنان سلامتی کونسل کی قراردادوں کی پاسداری جاری رکھے گا، اس بات پر زور دیا کہ فلسطینیوں کے لیے انصاف کو یقینی بنائے بغیر تنازعات کا کوئی خاتمہ نہیں ہو گا۔
