اردوورلڈکینیڈا(ویب نیوز)کینیڈا کے صوبہ اونٹاریو میں ڈرہم ریجنل پولیس سروس (DRPS) نے تصدیق کی ہے کہ منگل کی صبح اونٹاریو پولیس کالج کے قریب ایک ٹرانسپورٹ ٹرک سے ہونے والے تصادم میں زیرِ تربیت ایک پولیس اہلکار ہلاک جبکہ دوسرا شدید زخمی ہو گیا۔پولیس کے مطابق دونوں زیرِ تربیت اہلکار حادثے کے وقت پولیس کی تربیتی نشست میں شرکت کے لیے جا رہے تھے۔
ایلگن اونٹاریو پروونشل پولیس (OPP) کے مطابق حادثہ صبح تقریباً 11 بج کر 19 منٹ پر کالج لائن اور امپیریل روڈ کے چوراہے پر پیش آیا، جہاں ایک کار اور ٹرانسپورٹ ٹرک آپس میں ٹکرا گئے۔
حادثے میں ایک زیرِ تربیت اہلکار موقع پر ہی دم توڑ گیا، جبکہ دوسرے کو تشویشناک حالت میں مقامی اسپتال منتقل کیا گیا۔ دونوں اہلکاروں کی شناخت تاحال ظاہر نہیں کی گئی۔پولیس نے بتایا کہ ٹرانسپورٹ ٹرک کا ڈرائیور حادثے میں محفوظ رہا۔اونٹاریو پروونشل پولیس حادثے کی وجوہات کی تحقیقات کر رہی ہے۔
ڈرہم ریجنل پولیس سروس نے اپنے بیان میں کہا کہ اس مشکل وقت میں ان کی اولین ترجیح جاں بحق اور زخمی زیرِ تربیت اہلکاروں کے اہلِ خانہ، ساتھی زیرِ تربیت اہلکاروں، اساتذہ، دوستوں اور پولیس سروس کے ان تمام ارکان کی مدد کرنا ہے جو اس المناک سانحے سے غمزدہ ہیں۔ پولیس کا کہنا ہے کہ متاثرہ افراد کو ہر ممکن دیکھ بھال اور تعاون فراہم کیا جائے گا۔
دوسری جانب ڈرہم پولیس سروس بورڈ نے بھی ایک تعزیتی بیان جاری کرتے ہوئے جاں بحق ہونے والے زیرِ تربیت اہلکار کے اہلِ خانہ، دوستوں اور ساتھیوں سے اظہارِ افسوس کیا۔
بیان میں کہا گیا کہ ڈرہم ریجنل پولیس سروس کے تمام ارکان اس دل خراش سانحے پر گہرے رنج و غم میں مبتلا ہیں اور اس مشکل گھڑی میں پولیس چیف، قیادت، ڈرہم ریجنل پولیس ایسوسی ایشن کے نمائندے اور تمام اہلکار ایک دوسرے کا ہمدردی، محبت اور احترام کے ساتھ سہارا بنیں گے۔
ادھر صوبہ اونٹاریو کے وزیرِاعلیٰ ڈگ فورڈ نے بھی جاں بحق ہونے والے زیرِ تربیت اہلکار کے اہلِ خانہ سے تعزیت کا اظہار کیا۔انہوں نے اپنے بیان میں کہا کہ ان کی دعائیں اور نیک تمنائیں تشویشناک حالت میں زیرِ علاج دوسرے زیرِ تربیت اہلکار، اس کے اہلِ خانہ اور ڈرہم ریجنل پولیس سروس کے تمام ارکان کے ساتھ ہیں، جو اس انتہائی کٹھن اور تکلیف دہ وقت سے گزر رہے ہیں۔
