اردو ورلڈ کینیڈا ( ویب نیوز ) بھار ت کے سٹار بلے باز ویرات کوہلی کے بعد بھارتی سٹار کرکٹر دھونی نے بھی نئی تاریخ رقم کر دی ۔
پیر کو آئی پی ایل میچ میں چنئی سپر کنگز نے لکھنؤ سپر جائنٹس کو 5 وکٹوں سے شکست دے کر ایونٹ میں اپنی دوسری جیت یقینی بنائی۔ لکھنؤ میں کھیلے گئے میچ میں چنئی نے ٹاس جیت کر باؤلنگ کا فیصلہ کیا جس کے بعد لکھنؤ سپر جائنٹس نے مقررہ 20 اوورز میں 7 وکٹوں کے نقصان پر 166 رنز بنائے۔جواب میں، چنئی نے آخری اوور میں 5 وکٹوں کے نقصان کا ہدف حاصل کر لیا ۔دھونی نے 11 گیندوں پر 26 رنز کی ناقابل شکست اننگز کھیلی جس میں 4 چوکے اور ایک چھکا شامل تھا۔ اس کے علاوہ شیوم دوبے 37 گیندوں پر 43 رنز بنانے کے بعد ناٹ آؤٹ رہے۔
چنئی کے مہندر سنگھ دھونی کو ان کی شاندار بیٹنگ اور میچ میں 2 اسٹمپنگ اور 1 رن آؤٹ کرنے پر پلیئر آف دی میچ کا ایوارڈ دیا گیا، جس سے انہوں نے آئی پی ایل میں نئی تاریخ رقم کی۔بھارتی میڈیا کے مطابق 43 سالہ دھونی آئی پی ایل کی تاریخ میں مین آف دی میچ کا ایوارڈ جیتنے والے معمر ترین کھلاڑی بن گئے۔دھونی مین آف دی میچ کا ایوارڈ حاصل کر کے حیران رہ گئے اور میچ کے بعد کی پریزنٹیشن میں کہا، ’’میں سوچ رہا ہوں کہ آپ مجھے یہ ایوارڈ کیوں دے رہے ہیں؟ نور نے بہت اچھی گیند بازی کی، اسے ملنا چاہیے۔
