اردوورلڈکینیڈا(ویب نیوز)کینیڈا میں سرمایہ کاری کرنے والے شہریوں کو دنیا کی معروف ٹیکنالوجی کمپنی اینویڈیا (Nvidia) کے حصص میں اچانک شدید گراوٹ کے باعث مالی خدشات کا سامنا ہے، کمپنی کے طویل عرصے سے سربراہ اور شریک بانی جینسن ہوانگ کے استعفے کے بعد سرمایہ کاروں نے کمپنی کے مستقبل اور مصنوعی ذہانت کی عالمی صنعت پر اس کے اثرات کا ازسرنو جائزہ لینا شروع کردیا ہے۔
رپورٹ کے مطابق جمعرات کو امریکی اسٹاک مارکیٹ کھلتے ہی اینویڈیا کے حصص میں 14 فیصد تک کمی ریکارڈ کی گئی، تاہم بعد ازاں حصص کی قیمت میں کچھ بحالی ہوئی اور کاروباری دن کے اختتام پر مجموعی گراوٹ 4.3 فیصد رہی۔ کمپنی کے سربراہ جینسن ہوانگ نے سی ای او اور بورڈ رکن کے عہدے سے استعفیٰ دیا، جس کے بعد چیف فنانشل آفیسر کولیٹ کریس کو عبوری سی ای او مقرر کردیا گیا۔
مالیاتی ماہرین کے مطابق عبوری سربراہ کی فوری تقرری نے سرمایہ کاروں کو کسی حد تک اطمینان فراہم کیا، جس کے باعث ابتدائی شدید گراوٹ کے بعد حصص کی قیمت میں بہتری دیکھنے میں آئی۔
ڈی ہال انویسٹمنٹ پارٹنرز کے سینئر پورٹ فولیو مینیجر مائیکل ڈی ہال کا کہنا ہے کہ عبوری انتظامی بندوبست کے فوری اعلان نے سرمایہ کاروں کو یہ یقین دلایا کہ کمپنی کی قیادت کا معاملہ وقتی طور پر سنبھال لیا گیا ہے۔
اینویڈیا کی یہ گراوٹ اس لیے بھی غیر معمولی اہمیت رکھتی ہے کہ کمپنی ایک سال قبل 5 ٹریلین امریکی ڈالر کی مارکیٹ ویلیو حاصل کرنے والی تاریخ کی پہلی کمپنی بنی تھی، تاہم جینسن ہوانگ سے متعلق تنازعات اور استعفے کے بعد اس کی مارکیٹ ویلیو میں ایک ٹریلین ڈالر سے زیادہ کی کمی واقع ہوچکی ہے۔
جینسن ہوانگ نے اپنے ایک ازدواجی تعلق سے باہر تعلق کا اعتراف کیا ہے، تاہم انہوں نے اس بات کی تصدیق نہیں کی کہ آیا یہ تعلق ایلس ہوانگ نامی خاتون سے تھا یا نہیں، جس کے بارے میں امریکی انٹیلی جنس اداروں کا الزام ہے کہ وہ چین کے لیے کام کرتی رہی ہیں۔ نیویارک ٹائمز کی ایک رپورٹ میں کمپنی کی ایک نائب صدر کے ساتھ بھی ان کے تعلقات کا ذکر کیا گیا ہے، جو براہ راست ان کے ماتحت کام کرتی تھیں۔
کینیڈین سرمایہ کاروں کی پنشن اور بچت بھی متاثر ہونے کا خدشہ
اینویڈیا کے حصص میں گراوٹ کے اثرات صرف امریکی سرمایہ کاروں تک محدود نہیں بلکہ کینیڈا کے شہریوں کی سرمایہ کاری، ریٹائرمنٹ فنڈز اور پنشن بچت بھی اس سے متاثر ہوسکتی ہے۔
اس کی بنیادی وجہ یہ ہے کہ اینویڈیا دنیا کی بڑی اسٹاک مارکیٹوں کے اہم ترین حصص میں شامل ہے۔ کمپنی کا وزن ایس اینڈ پی 500 انڈیکس میں تقریباً 6 فیصد جبکہ ٹیکنالوجی پر مبنی نیسڈیک انڈیکس میں تقریباً 9 فیصد ہے۔
کینیڈا میں بڑی تعداد میں شہری ایکسچینج ٹریڈڈ فنڈز (ای ٹی ایف) کے ذریعے سرمایہ کاری کرتے ہیں، جو مختلف اسٹاک مارکیٹ انڈیکس کی کارکردگی کے مطابق چلتے ہیں۔ ایسے فنڈز میں اینویڈیا کے حصص کی بڑی موجودگی کے باعث کمپنی کی قیمت میں اتار چڑھاؤ براہ راست سرمایہ کاروں کی مجموعی سرمایہ کاری کو متاثر کرسکتا ہے۔
مالیاتی ماہرین کا کہنا ہے کہ بعض میوچل فنڈز بھی ٹیکنالوجی کمپنیوں میں بڑی سرمایہ کاری رکھتے ہیں، تاہم پیشہ ورانہ انتظام کے باعث ان میں مختلف شعبوں کی کمپنیوں کو شامل کرکے خطرات تقسیم کرنے کی گنجائش زیادہ ہوسکتی ہے۔
سرٹیفائیڈ فنانشل پلانر زینب ولیمز کے مطابق بہت سے سرمایہ کار مختلف ای ٹی ایف خرید کر یہ سمجھتے ہیں کہ ان کی سرمایہ کاری مختلف شعبوں میں تقسیم ہوچکی ہے، لیکن حقیقت میں ان فنڈز میں کئی ایک ہی بڑی ٹیکنالوجی کمپنیاں شامل ہوتی ہیں۔ اس طرح سرمایہ کار غیر محسوس طریقے سے ایک ہی قسم کے مالیاتی خطرے کا سامنا کررہے ہوتے ہیں۔
مصنوعی ذہانت کی صنعت بھی دباؤ میں آسکتی ہے
اینویڈیا کی اہمیت صرف اسٹاک مارکیٹ تک محدود نہیں بلکہ مصنوعی ذہانت کی عالمی صنعت میں بھی کمپنی مرکزی کردار ادا کررہی ہے۔ کمپنی کے تیار کردہ چپس دنیا بھر میں اے آئی ڈیٹا سینٹرز، چیٹ جی پی ٹی اور ڈرونز سمیت مختلف جدید ٹیکنالوجیز میں استعمال ہوتے ہیں۔
رپورٹس کے مطابق اے آئی چپس کی عالمی مارکیٹ میں اینویڈیا کا حصہ تقریباً 80 فیصد ہے، جس کے باعث کمپنی کی قیادت میں تبدیلی اور مالیاتی پالیسیوں میں ممکنہ ردوبدل پوری ٹیکنالوجی انڈسٹری پر اثرانداز ہوسکتا ہے۔
اینویڈیا نے دیگر مصنوعی ذہانت کی کمپنیوں میں بھی بھاری سرمایہ کاری کررکھی ہے، جن میں اینتھروپک، ٹورنٹو میں قائم کوہیر اور کلاؤڈ کمپیوٹنگ کمپنی کورویو شامل ہیں۔
مائیکل ڈی ہال کے مطابق جینسن ہوانگ ان سرمایہ کاری معاہدوں اور مالیاتی شراکت داریوں میں اہم کردار ادا کرتے رہے ہیں، اس لیے اب یہ سوال پیدا ہوگیا ہے کہ نئی قیادت مستقبل میں بھی اسی رفتار سے دیگر اے آئی کمپنیوں کو مالی معاونت فراہم کرے گی یا نہیں۔
اینویڈیا کے حریفوں کے حصص میں اضافہ
دوسری جانب اینویڈیا کے حصص میں کمی کے باوجود ٹیکنالوجی کی مجموعی صنعت میں بڑے پیمانے پر منفی اثرات سامنے نہیں آئے۔ اس کے حریف چپ ساز اداروں براڈکام اور اے ایم ڈی کے حصص میں اضافہ ریکارڈ کیا گیا، جس سے ظاہر ہوتا ہے کہ سرمایہ کاروں کی توجہ دیگر کمپنیوں کی جانب منتقل ہوسکتی ہے۔
مری ویلتھ گروپ کے صدر جیمی مرے کے مطابق مصنوعی ذہانت کے شعبے میں سرمایہ کاری کا سلسلہ رکنے والا نہیں، البتہ اس سرمایہ کاری کا رخ مختلف کمپنیوں کی جانب منتقل ہوسکتا ہے۔
مالیاتی ماہرین کا کہنا ہے کہ متنوع شعبوں اور مختلف ممالک میں سرمایہ کاری رکھنے والے افراد کو فوری طور پر زیادہ پریشان ہونے کی ضرورت نہیں، تاہم اینویڈیا کے حالیہ بحران نے یہ واضح کردیا ہے کہ صرف بڑی تعداد میں فنڈز خرید لینا سرمایہ کاری کو محفوظ بنانے کے لیے کافی نہیں۔
ماہرین نے کینیڈین سرمایہ کاروں کو مشورہ دیا ہے کہ وہ اپنے ای ٹی ایف اور دیگر سرمایہ کاری فنڈز کا جائزہ لیں، یہ معلوم کریں کہ ان کی کتنی رقم ٹیکنالوجی اور مصنوعی ذہانت کی کمپنیوں سے منسلک ہے اور ضرورت پڑنے پر مختلف شعبوں اور ممالک میں سرمایہ کاری تقسیم کریں۔
