اردوورلڈکینیڈا(ویب نیوز)امریکی صدر ڈونلڈ ٹرمپ نے ایران کو ایک بار پھر سخت انتباہ دیتے ہوئے کہا ہے کہ ایرانی جوہری تنصیبات میں سے ایک یا دو مقامات اب بھی امریکی کارروائی کی زد میں آنے سے باقی ہیں اور اگر واشنگٹن نے ضرورت محسوس کی تو امریکی فوج صرف 10 منٹ کے اندر انہیں نشانہ بنا سکتی ہے۔
ایران کے ساتھ جاری مذاکرات پر گفتگو کرتے ہوئے ٹرمپ نے کہا کہ دونوں ممالک کے درمیان بات چیت درست سمت میں آگے بڑھ رہی ہے اور ایران بھی کسی معاہدے تک پہنچنے میں دلچسپی رکھتا ہے۔ تاہم ان کے بقول امریکا اس معاملے میں جلد بازی سے کام نہیں لینا چاہتا اور کسی بھی معاہدے کے لیے محتاط انداز میں آگے بڑھے گا۔
ایران کے وعدوں پر اعتماد نہیں، ٹرمپ
امریکی صدر نے تہران کے طرزِعمل پر عدم اعتماد کا اظہار کرتے ہوئے کہا کہ ایران معاہدہ کرنے کے بعد اکثر اپنے وعدوں سے پیچھے ہٹ جاتا ہے، جس کے باعث اس پر مکمل بھروسا کرنا مشکل ہے۔ انہوں نے کہا کہ اب اصل بات یہ دیکھنا ہے کہ ایران واقعی کسی معاہدے پر پہنچنے کے لیے سنجیدہ ہے یا نہیں۔
ایران پر دوبارہ فوجی حملوں کے امکان سے متعلق سوال پر ٹرمپ نے اسے بے وقوفانہ سوال قرار دیا، تاہم ساتھ ہی دعویٰ کیا کہ امریکا پہلے ہی ایران کی بحریہ، فضائیہ، فضائی دفاعی نظام اور متعدد جوہری تنصیبات کو نشانہ بنا چکا ہے۔
یہ بھی پڑھیں :اسلام آباد مفاہمتی یادداشت مسترد کرنے پر ایران کی ٹرمپ پر تنقید، امریکی سفارت کاری پر سوالات اٹھا دیے
باقی جوہری مقامات بھی نشانے پر
ٹرمپ کے مطابق ایران کی ایک یا دو جوہری تنصیبات ایسی ہیں جن کے خلاف کارروائی ابھی باقی ہے۔ ان کا کہنا تھا کہ اگر ضرورت پیش آئی تو امریکی فوج انتہائی مختصر وقت میں ان مقامات کو نشانہ بنانے کی صلاحیت رکھتی ہے اور اس کارروائی میں صرف 10 منٹ لگ سکتے ہیں۔
ٹرمپ کے اس بیان میں ایک جانب ایران کے ساتھ مذاکرات جاری رکھنے اور معاہدے کی امید کا اظہار کیا گیا ہے، جبکہ دوسری جانب فوجی کارروائی کی دھمکی بھی برقرار رکھی گئی ہے۔ اس طرح واشنگٹن نے تہران کو واضح پیغام دیا ہے کہ مذاکرات کے باوجود فوجی آپشن اس کے زیرِ غور موجود ہے۔
