اردوورلڈکینیڈا(ویب نیوز)کینیڈا کے شہر کیلگری میں 911 ایمرجنسی سروس کی ایک ڈسپیچر پر خفیہ معلومات غیر مجاز شخص کو فراہم کرنے کے الزام میں مقدمہ درج کر لیا گیا ہے۔
کیلگری پولیس کے مطابق جنوری 2026 میں اس وقت تحقیقات کا آغاز کیا گیا جب معلوم ہوا کہ ایمرجنسی کالز سے متعلق نجی معلومات سرکاری نظام سے باہر دیکھی اور شیئر کی جا رہی ہیں۔
تحقیقات کے مطابق جولائی 2023 سے جنوری 2024 کے درمیان ایک ڈسپیچر نے اپنے عہدے کا ناجائز فائدہ اٹھاتے ہوئے حساس معلومات تک رسائی حاصل کی اور انہیں ایک ایسے شخص کو بھیجا جو ان معلومات کا مجاز نہیں تھا۔
پولیس نے رواں سال 31 مارچ کو سرچ وارنٹ پر کارروائی کرتے ہوئے الیکٹرانک آلات قبضے میں لیے۔ حکام کا کہنا ہے کہ ان آلات سے کمپیوٹر ایڈیڈ ڈسپیچ (CAD) سسٹم کے حقیقی واقعات کے اسکرین شاٹس، ڈسپیچرز کے پیغامات اور ایمرجنسی واقعات میں شامل افراد کی ذاتی معلومات برآمد ہوئیں۔
برآمد ہونے والی معلومات میں نام، فون نمبر، پتے اور پولیس و 911 ایمرجنسی کالز کی تفصیلات شامل تھیں۔ پولیس کے مطابق اسکرین شاٹس کی تصدیق کی گئی اور وہ 911 اور کیلگری پولیس کے اصل ریکارڈ سے مطابقت رکھتے تھے۔
43 سالہ جیسیکا لن نیلسن پر عوامی عہدے پر اعتماد کے غلط استعمال (Breach of Trust by a Public Officer) کا الزام عائد کیا گیا ہے۔ وہ اگست میں عدالت میں پیش ہوں گی۔
پولیس کا کہنا ہے کہ اس معاملے میں 911 سروس کا کوئی دوسرا ملازم ملوث نہیں پایا گیا۔
پولیس نے واقعے سے متعلق مزید معلومات رکھنے والے افراد سے اپیل کی ہے کہ وہ 403-266-1234 پر رابطہ کریں یا گمنام طور پر کرائم اسٹاپرز کے ذریعے اطلاع دیں۔
