اردو ورلڈ کینیڈا ( ویب نیوز )وزیر اعلی پنجاب چوہدری پرویز الہی نے صوبے بھر کے تمام سرکاری ہسپتالوں کے ایمرجنسی وارڈز کو اپ گریڈ کرنے کی منظوری دیتے ہوئے مریضوں کو مفت ادویات دینے کا اعلان کیا ہے۔
رپورٹ کے مطابق وزیراعلی پنجاب نے ہسپتال میں بیڈز کی تعداد میں اضافہ کرتے ہوئے وزیر آباد انسٹی ٹیوٹ آف کارڈیالوجی ڈبلیو آئی سی کو اپ گریڈ کرنے کی بھی منظوری دی۔
نئے وزیراعلی پنجاب کی زیر صدارت وزیراعلی آفس میں ہونے والے اجلاس میں سابق وزیراعظم عمران خان کے ہیلتھ کارڈ پروگرام کو مزید بہتر انداز میں وسعت دینے کا فیصلہ کیا گیا۔
اس موقع پر گفتگو کرتے ہوئے پرویز الہی نے ایمرجنسی میں مفت ادویات کا حصول مریضوں کا حق قرار دیا۔
وزیرآباد انسٹی ٹیوٹ آف کارڈیالوجی کے بارے میں بات کرتے ہوئے انہوں نے کہا کہ اس انسٹی ٹیوٹ میں مریضوں کے لیے بستروں کی تعداد 400 تک بڑھا دی جائے گی۔
انہوں نے مزید کہا کہ انسٹی ٹیوٹ میں ڈاکٹروں خصوصا اینستھیشیالوجسٹ اور پیرا میڈیکس کی کمی کو فوری طور پر پورا کیا جائے گا اور انستھیزیولوجسٹوں کو خصوصی اشتہار دیا جائے گا تاکہ وہ ہسپتال میں اپنی خدمات سرانجام دیں۔
