ishtiaq ahmed 
منی لانڈرنگ کیس میں لاہور کی عدالت نے ایف آئی اے منی لانڈرنگ کیس میں وزیر اعظم شہباز شریف اور حمزہ شہباز کو فرد جرم کے لیے طلب کر لیا۔
لاہور کی خصوصی سینٹرل عدالت میں وزیراعظم شہباز شریف، حمزہ شہباز اور دیگر کے خلاف منی لانڈرنگ کیس کی سماعت ہوئی، جس میں شہباز شریف اور حمزہ شہباز نے ایک دن کی حاضری سے استثنیٰ کی درخواست کی۔
شہباز شریف کے وکیل امجد پرویز نے بتایا کہ کل شہباز شریف اسلام آباد میں سرکاری ملاقاتوں میں مصروف تھے، گزشتہ رات وہ اسلام آباد سے لاہور آنے کے لیے تیار تھے، تاہم خراب موسم کے باعث انہیں سفر سے روک دیا گیا۔
ایف آئی اے کے وکیل نے کہا کہ انہیں شہباز شریف اور حمزہ کی حاضری سے استثنیٰ پر کوئی اعتراض نہیں۔
ایف آئی اے پراسیکیوٹر نے اپنے دلائل میں کہا کہ ملزم نے ضمانت منظور ہوتے ہی عدالت میں پیش ہونا چھوڑ دیا، جبکہ ملزم ملک مقصود کا ڈیتھ سرٹیفکیٹ جمع کرا دیا گیا ہے، ملزم کی موت کی تصدیق ہو چکی ہے۔
سماعت کے دوران ایف آئی اے نے ملزم سلیمان شہباز کی جائیداد کا ریکارڈ پیش کیا۔
بعد ازاں عدالت نے شہباز شریف اور حمزہ شہباز کو آئندہ سماعت پر فرد جرم کے لیے طلب کرتے ہوئے سماعت 7 ستمبر تک ملتوی کر دی۔
