اردو ورلڈ کینیڈا ( ویب نیوز ) امریکی عدالت نے فٹبال ورلڈکپ کے دوران ایران کے سابق شاہی دور سے منسلک پرچم کے استعمال پر پابندی کو برقرار رکھنے کا حکم دے دیا ہے۔

لاس اینجلس کاؤنٹی کی عدالت میں دائر کیس کی سماعت کے بعد عدالت نے فیصلہ سناتے ہوئے قرار دیا کہ عالمی فٹبال مقابلوں میں ایران کی نمائندگی صرف اس کے موجودہ سرکاری قومی پرچم کے ذریعے ہی کی جا سکتی ہے۔
فیصلے کے مطابق شاہی دور سے منسلک علامتی پرچم، جس میں شیر اور سورج کی علامت شامل ہے، اسٹیڈیمز یا سرکاری تقریب میں لہرانے کی اجازت نہیں ہوگی۔
واضح رہے کہ یہ پرچم 1979 کے ایرانی انقلاب سے قبل ملک کی شاہی حکومت کی علامت سمجھا جاتا تھا اور آج بھی بعض حلقے اسے تاریخی یا سیاسی علامت کے طور پر استعمال کرتے ہیں، تاہم موجودہ ایرانی سرکاری پرچم مختلف ڈیزائن پر مشتمل ہے۔عدالتی فیصلے میں کہا گیا ہے کہ بین الاقوامی کھیلوں کے ایونٹس میں صرف تسلیم شدہ ریاستی علامات ہی استعمال کی جا سکتی ہیں۔