اردو ورلڈ کینیڈا (و یب نیوز ) برطانیہ کے شہر بلیک پول میں ایک 13 ماہ کے رضاعی بچے کی ہلاکت کے انتہائی سنگین مقدمے میں ایک اسکول ٹیچر اور اس کے ساتھی کو عدالت نے مجرم قرار دے دیا ہے۔
عدالتی کارروائی کے مطابق بچے کو اڈاپشن سسٹم کے تحت ایک رضاعی خاندان سے ہٹا کر ملزمان کے حوالے کیا گیا تھا۔ کچھ ماہ بعد بچے کی حالت بگڑنے اور متعدد بار اسپتال منتقل کیے جانے کے باوجود وہ جانبر نہ ہو سکا۔پوسٹ مارٹم رپورٹ میں یہ بات سامنے آئی کہ بچے کے جسم پر متعدد زخم اور چوٹوں کے نشانات موجود تھے، جبکہ اس کی موت کی وجہ دم گھٹنے کو قرار دیا گیا ہے۔
ابتدائی طور پر ملزمان نے واقعے کو حادثہ ظاہر کرنے کی کوشش کی، تاہم تحقیقات میں ان کے بیانات اور شواہد میں تضادات سامنے آئے۔پولیس اور پراسیکیوشن کے مطابق دورانِ تفتیش ایسے شواہد بھی ملے جن سے معلوم ہوا کہ بچے کے ساتھ سنگین نوعیت کی بدسلوکی کی گئی۔ عدالت نے دونوں ملزمان کو قتل، بچوں پر ظلم اور دیگر سنگین جرائم کا مرتکب قرار دیا۔
عدالت نے فیصلہ محفوظ کرتے ہوئے کہا ہے کہ سزا کا اعلان 18 جون 2026 کو کیا جائے گا۔برطانوی چائلڈ پروٹیکشن اداروں نے واقعے کے بعد اڈاپشن اور سوشل سروسز کے نظام پر بھی آزادانہ تحقیقات شروع کر دی ہیں تاکہ یہ معلوم کیا جا سکے کہ نگرانی کے نظام میں کہاں ناکامی ہوئی۔
